Ka Shillong Cricket Association-A da jop ko yaka Shillong Cricket Association-B da 10 Wicket haka sngi wa ar ka Inter-District Cricket Tournament haka Zone 1 wa pynman ha Nongpoh ynne ka sngi (ka sngi wa ar) wa pynman daka Meghalaya Cricket Association.
Ha Mendipathar won, ka Tura District Cricket Association-A da jop ko da chi Innings wa 77 Run yaka TDCA-B ha Zone 2.
Hawa pteiñ yaka Innings wa nyngkong wa da kamai 254/4, ka SCA-A kawa tam da 74 Run yaka SCA-B da kamai ko da 322 All Out na ki 64 Over. U Swastic Chettri da kamai boon dooh u 88 Not Out. U Aryan Bora won da yoh u sa chi Wicket najrong ki 4 Wicket wa yoh u ynnin ka sngi yow yoh 5/75, katwa u Mukesh Kumar da yoh u 2/36.
Deiwa bood da 142 Run, ka SCA-B da kamai ko 162 All Out, iwa yahkhmat da u Prashant Ojha uwa kamai 82 na 55 bol. U Lokesh Turaha (4/14) wa Bipin Kumar Ray (2/32) toh kiwa yoh Wicket. Ka SCA-A da hap ko wow Bat sa chisien yow pynjop deiwa leh ya ini na ki 2.4 Overs, deiwa yoh 23/0.
Ha ka Zone-2 won, ka TDCA-A da jop ko yaka kylla khlem ynne ka sngi wei da jied ko wow kawang bol chwa. U Stanford Marak da yoh u 59 katwa u Manish Sharma da yoh u 3/14 heiwa ka TDCA-B da yoh ko 138 All Out, heiwa ka TDCA-A da jubab ko da 296 All Out. U Selvastone Marak da kamai boon dooh u da 53, katwa u Brian Lara Sangma da yoh u 4/70.
Ka TDCA-B da lai ko cha ka Innings wa ar deiwa em 158 Run chadien tangwa da ye ko wow kamai 81 All Out. U Bishal Berman da kamai u 44 Run katwa u Purav Agarwal da yoh u 4/12 yow pynhaap yaka TDCA-B deiwa kamai duna bha.
