Ka North Garo Hills da yoh ko wow psiah Final haka Meghalaya Cricket Association U-14 Inter District Tournament 2021 ynne ka sngi khaddooh ki yalehke ka Zone 2 wa pynman ha Mendipathar.
I rem ka West Khasi Hills haka East Garo Hills hei step da pyntikna ko wa ka NGH u man kam kawa yoh nyngkong na kani ka Zone. Chwa ynne ka sngi, ka WKH da jop ko ar sien katwa ka NGH le sien. Ka WKH kamtæ da emkaam ko wow jop ynne ka sngi yow em laad.
Ka West Khasi Hills ynne da rem ko haka East Garo Hills da ar Run. Ka EGH da Bat nyngkong ko wei da kamai ko 114/7 na 20 Over (Aristho R Marak 41; Jemilson Marngar 3/23). Ka WKH neidaw wa haap ma haap ki Wicket da yoh ko 112/9 (Raphael Nongsiang 24; Aristho R Marak 3/31). U Marak da yoh u yei naam Player-of-the-match deiwa lehbha u da ka bol waka Bat.
Ha ka yalehke wa bood, uwa kawang bol ka Tura u Darniel Sangma da pynhaap u chiteiñ kiwa Bat ka NGH deiwa yoh 5/18, iwa man iwa lehbha dooh na waroh kiwa kawang bol ha kani ka samoi wei da yoh u leh yei naam Player-of-the-match. Ka NGH won de ko wow kamai du 87 Run (Chukam Matsram D Shira 22), iwa da ye ka Tura wow kdong deiwa dooh 5 Wicket deiwa emkaam 12.2 Over yow jop (Harshit Prasad 34; Dakchakra Marak 3/22).
