I lehbha kiwa kawang bol ka Shillong Cricket Association waka South Garo Hills da e ko yei jop ya kini ki arliang ha ki yalehke ka Inter District U-19 Women’s Cricket Tournament ynne ka sngi.
Ha ka Group B ka Zone 1, ka Shillong da jop suk ko da 10 Wicket pyrchah ya ka East Jaiñtia Cricket Association ha Nongkhrah, Ri-Bhoi. Ha ka Zone 2 won wa pynman ha Williamnagar, East Garo Hills; ka SGH da jop ko ya ka Tura District Cricket Association da 6 Wicket.
Ka EJCA da jop ko yaka kylla khlem wei da jied ko wow Bat nyngkong tangwa da ye ko wow kamai du 59 deiwa dooh lut ya ki Wicket na ki 16.3 Over. Ka Emilia Nongtdu (14) toh du ka kawa ye u yoh palat 10 Run. Kiwa kawang bol ka Shillong kitæ ka Anjana Kumar da yoh ko 3/8, ka Player-of-the-Match ka Jayshree Singh da yoh ko 3/17 katwa ka Neelam Roy da yoh ko 2/9 waka Suriti Kumar Ray 1/9.
Hawa kdong Run, ka Jayshree (18 Not Out) waka Monica Singh (10 Not Out) wa ki 32 tylli ki Extra da pynjop ya ka Shillong ha ka Over wa 9.
Ha kawi won ka yalehke, ka SGH da jop ko ya ka kylla khlem wei da jied ko wow kawang bol nyngkong. Ka Pillika R Marak waka Awesa G Momin da yoh ki mar 20 Run heiwa ka Awesa da neh ko khlem haap, tangwa ka Tura da ye ko wow kamai du 78 Run na ki 20.5 Over deiwa dooh ya waroh ki Wicket. Ka Marme M Sangma da yoh ko 3/27, ka Smillin N Sangma (2/10), ka Jaylynn Mary R Marak (2/12) waka Dianchidora (2/17).
Ka SGH hawa kdong Run da dooh ko 4 tylli ki Wicket heiwa ar tylli da pynhaap da ka Grimchi Ch Sangma (2/27), tangwa ka Dianchidora da ye ko wow Bat hadooh wa kut deiwa yoh 27 Run yow pynjop ha ka Over wa 18.
