Mar ya dep ka BJP wow pynbna yei pyrtuid ki 60 ngut ki kyrtong MLA ha Manipur ynne ka sngi, mih wot i kulmar na kiwa kyrchaan ka Party hadooh wa da em leh kiwa da pynbna wow mih noh napoh ka seiñ.
Da em leh kiwa thang ya ki dur bula u PM, Narendra Modi wei da em leh kiwa da mih cha sarok wow pynyoo yei pyrchah neidaw wym kmen ki yei pyrtuid ki kyrtong.
Da em leh ki yung krehkaam ka BJP kiwa da chah pynsih heiwa wei da rah Placard leh ha kiwa boon ki thaw hajan ka Headquarter ka BJP ha Imphal.
Ha ka thup kyrtong ka BJP wa da pynbna da em 10 ngut kiwa yahkhmat warim ka Congress kiwa da psiah chapoh ka BJP.
Ha u snem 2017, ka BJP da jop ko 21 ngut ki MLA wei da chna sorkar ko deiwa krehlang wa kiwi ki Party wa khian wa ki MLA samen.
Na ki kyrtong wa da pynbna da em 3 ngut ki kynthai, uwi u kyrtong Muslim wei u heh warim ka Congress ha Manipur u Govinddas Konthoujam leh da yoh Ticket u na ka BJP.
Puræ leh: Pynbna kyrtong MLA ka BJP hawa waroh ki 60 tylli ki Constituency ha Manipur
