theme-sticky-logo-alt
theme-logo-alt

Mih i kulmar i mynsoo nei yah thuk-thuk khlemakor ha ki sarokbah

I pynhær kari kiwa yah thuk-thuk da pynsier mynsien ko ya kiwa lai luti ha ki sarokbah namo ki National Highway khamtam ha u sarok Shillong Bypass heiwa uwi u bru paidbah wa tip kam u Bisharhok Shangpliang uwa na Nongpoh da pyntip u wa da sakhi u ha ka 3 tarik uni u bnai heiwa uwi u khynnah wa dang 16 snem da mynsoo u neidaw wa joor pynhær thuk-thuk.

Uwa sakhi da ong u wa uni u khynnah toh uwa yah ya ka thuk-thuk wa khlanbor 200CC kawa ym pu em Number wei da yah u leh hei rukom wa yoo maa bha.

Ka thaw wa chwa u poi ka Toll Plaza ka Mawryngkneng da man ko leh kam ki bynta wa sñiawbang bha ki bru wow pynman kam ka thaw pynhær kari deiwa pynman leh ya ka kam ka Racing Track.

Kamtæ da khana wa kawi ka bru wa da heh rta wa lai luti da ka kari da chah tyrrah ka kari ko neiliang timun heipor 5:00 waje i janmiet heiwa uwa yah kari ya ka da ksoh u ya uni u khynnah khynroo iwa da pynpoi kylla cha i yachoh ha u sarokbah.

Tangwa chwa wow pyntip cha ki pulit kini ki chi lok da yut ki na ini i thaw da ki thuk-thuk yong ki heiwa uni uwa dang 16 snem da pyrchang u wow lai chakhmat ka kari deiwa psiah napydri ki kari heiwa da oor da haap noh u naka thuk-thuk u hadooh wa da mynsoo u.

Ini kam ini i yah khlemakor leh toh iwa da yoo bha ha ki sarok Shillong-Sohra, Shillong-Dawki wa Shillong-Guwahati iwa da booh hei maa ya waroh nadooh kiwa yah kari kamjooh kiwa lai dei kjat.

Kamtæ da kyntu ya ki pulit ka Meghalaya wow khang ya kini ki Bike Racing ki leh Stunt ha ki sarok paidbah.

Share this:
Previous

Pynman ka GAVI Alliance ya ka yalang kammon wow pynyoh tika ya waroh

Next

Khlaad noh u MP warim ka jylla, u Robert Kharshiing