Ynne ka sngi ka seiñ UDP East Jaiñtia Hills District da pynskem ko ya kiwa kitkaam ka chnat khynroo namo ka Youth Wing ka Party hapoh ka District heiwa da wan sakhi ya ka da ki heh ka Party nadooh u State President ka Party, u Metbah Lyngdoh uwa man leh u Lamphang ha ka yung dorbar chna aiñ ka jylla wa u State General Secretary ka Party u Dr. Jemino Mawthoh.
Da emlang leh ki MLA ka Party nadooh u Kyrmen Shylla, MLA ka Khliehriat, u Pius Marwein, MLA ka Ranikor wa ki MDC ka Party na East wa West Jaiñtia Hills.
Ya ka yalang ha kani ka sngi da pynlai da u Finelyness Bareh uwa man u MDC ka Party na Rymbai Khliehriat Constituency wei da yoh ya ki kyntien pdiang burom na u Lasky Rymbai uwa man u MDC na Tuber Constituency.
U Metbah hadien wa pynskem wei pynkup burom u ya kiwa kitkaam ka chnat khynroo namo ka Youth Wing ka Party ha East Jaiñtia Hills, da kyntu ya ki wow man kiwa kitkhia wei wow man kiwa minot ha ki kaam yong ka seiñ.
U Moonlight Pariat uwa man u President ka Party na West Jaiñtia Hills hawa e i klam da ong u wa ha ka riti synchaar ka Party, da e bor ko wow chna ya ka Youth Wing wow em ha ki bynta wow kreh neibynta ka Party ha ki Constituency wei wot cha kiwi ki Constituency leh kamjooh. Da yooluti u leh wa ha u 2023 u synchaar ko samen ya ka jylla waroh kawi.
U Embhahlang Syiemlieh hawa e yei klam da kyntu u ya i krehlang wei da ngait skem u leh wa ha u 2023 ka Party u synchaar ko samen heiwa u President ka Party, u Metbah Lyngdoh u man u kam u Montri Rangbah ka jylla.
U Pius Marwein, da ong u wa ki paidbah tip che ki iyi iwa ka Party da leh ko ha ka sorkar wa katni wa krehlang wa kiwi ki Party wei da sakhi ki yeini waroh wei da kyruiñ ki cha ka katni.
Da ong u wa ki paidbah ka jylla kyrmen skem ki wa ka UDP u yahkhmat ko ya ka jylla ha kani ka kynti deiwa kynmoo u leh ya u snem 1998 heiwa ka Party da yoh wa mihkhmat ko na waroh 7 Constituency ka Ri-loom Jaiñtia.
U Dr. Jemino Mawthoh da ong u wa katni ka Party da man ko kawa khlan bha heiwa katni da em hadooh 16-17 ngut ki MLA kiwa kwah u yakhun na ka UDP ha u 2023.
U Kyrmen Shylla hawa e yei klam da ong u wa kam ki MLA boonkaam ki wow thooh yarap neibynta ka Constituency katwa kamtæ em ki por ki bru ymyoh ki wow yaklam wa oo deiwa kyntu wow man kiwa krehlang wei wow em i mynsien maya wow kdaw ya ka luti ya ki.
Da khana u leh ya ki kaam wa sahteiñ ha Constituency kam u sarok cha Sohkymphor, kamtæ neiliang yong oo da booddien u wow chna pynmiat noh ya uni u sarok na Sohkymphor chadooh Byrwai.
Heiyatoh wa i kyntien wa ong wa ka UDP kut ko du ha Khanapara, da ong u wa ym emkaam wow lai cha kiwi ki jylla neibhah ka Meghalaya man ko kawa yoosuk wei kawa miat bha wei kwah ki wow yada ya i rukom im wa kyrpang ki paidbah ka jylla.
U Metbah Lyngdoh da ong u wa ha ka Election wow wan i jied ya kiwa mihkhmat ka pyrla u noh ko cha ki khynroo khamtam kiwa hapoh 50 snem i rta. Da emkaam bha ya ki khynroo neibhah wa man ki kiwa dang khlan wei kiwa chait.
Chooh chooh da ong u wa kwah u yah ya ki khynroo katni neibhah ki toh ka mynried ka jylla neibhah waroh daw poi i por wow chong-ngiah wei manda chong ki wow rap won toh ki khynroo wa katni.
Da ong u wa i daw wa kwah kiwa boon wow yakhun na ka UDP toh wa yoo ki wa ka Party toh kawa yatylli kawa kreh neibynta ki jaitbru ka jylla.
Kiwi kiwa da klam ha kani ka sngi kynthup ki ya u Coming Tlang, President ka Youth Wing, u Alantry F Dkhar, u Vice President ka State UDP wa kiwi kiwi.
Ya ki kyntien khublei ha kani ka sngi da e da u Wilson Tariang, u Asst. Secretary ka UDP, East Jaiñtia Hills.
