Jowai: Haka Public Hearing wa da pynman ynne ka sngi ha chnong Lumchnong da sñiaw ya i sur ki paidbah ha kani ka thaaiñ leh da pyn-eh ki wow dawa bait na ka sorkar wow pynneh ya ka C&RD Block ha ka chnong Lumshnong deiwa ong wa toh ka thaw wa man pyrdi nadooh ki thaaiñ khappood kam ka Malidor, Huroi, Hingkaria, neibhah wa booh ko hei eh ya ki paidbah neidaw wa jngai ware i ya ki wow lai emkaam cha Block.
Ki paidbah na ki thaaiñ Huroi, Hingkaria hawa klam da pynsñiaw ki yei diaw mynsien neibhah du wow lai emkaam ha Khliehriat leh chem chitom ki nalor wa sih ki sarok cha kini ki thaaiñ wei haap lut ki hadooh T. 1500 ka bai kari wei wot tang ki kari kamai leh ym em wei teiñ teiñ haap sahmiet ki kat chawa yoh. Kamtæ da ong ki wa na kini ki daw ki paidbah da randien noh ki na ki scheme sorkar waphær waphær wei sahdien bait ki hadooh katni.
Da ong ki leh wa i dawa Block ha kini ki thaaiñ da em chwa i nadooh ki snem 1996-97 da kawi ka seiñ wa tip kam ka All Narpuh Student Association, tangwa sñiawsih won wa da yoh da ka Saipung. Da ong ki wa ha u snem 2013 heipor wa u Mukul Sangma wan u ha Umkiang da e dorkhat leh wow dawa Block, wei dei yoo jngai yong ka sorkar warim wa yahkhmat da oo hi ha ka 9 Duyatra da pynmih ya ka hukum wow kyrriah noh ya ka Block na Wapung cha Lumchnong neibynta i emkaam ki paidbah ym kamwa da pynbaad wa toh ki daw politics.
Ka R. Bareh kawi na kiwa chong chnong naki thaaiñ khappood da ong ko, “I man i ki nongkyndong wa dang sahdoom wei i che u wa i du hei miet na ka ri Bangladesh, kamtæ kwah i wa ym du tang i che na Bangladesh tangwa e wa i che u wa i na kani ka ri India wa jylla yong i leh u wan ko lyngba kani ka Block da ki kaam pynroi”.
“Ha’o da slem angnood i wow yoh ya ka Block khnang wow myntoi kiwa boon ki paaid ha ki thaaiñ nongkyndong neibhah ha ka thaaiñ Narpuh dang boon toh ki warep kiwa dooh kamtæ da leh khlem pyrkhat jngai neibhha wa ka jooh ka sorkar wa kyrriah na Khliehriat cha Wapung wei ka jooh hi wa kyrriah na Wapung cha Lumshnong” da ong u MDC ka thaaiñ D. Pohshna.
Neilang u MLA ka thaaiñ, u Shitlang Pale leh da emlang u ha kani ka sngi wei hawa e i klam da ong u wa neiliang ka sorkar warim da rai ko wow rah ya ka Block na Wapung cha Lumshnong toh hajrong ka yurim wa da bichaar bniah yei man i long ka thaw, i jngai wei da pyrkhat wa ka Lumshnong toh ka thaw wa pyrdi wei kawa jngai na sor khnang wow ye u wanrah ya ki kaam pynroi.
Ha i jooh i por da kular wow kyrpaad ya ka sorkar wow pynneh ya ka Block ha kani ka chnong.
Kiwi kiwa da klam ha kani ka sngi kynthup ki ya u Waheh Chnong na Ratachera, u K. Pohïing, Dolloi Elaka Narpuh W. Lyngdoh, waheh chnong ka Leijri u A. Pohsyntiew, waheh chnong ka Borsora u D. Lamare wa kiwi kiwi kiwa da pynsñiaw wa la man katwa man ym hun ki wow dooh ya ka C&RD Block wot lada haap lai cha yung kasari katwa ya ka Wapung toh u e da kawa thymme.
Kam wow pynkynmoo, ynnin ka sngi ki bor District East Jaiñtia Hills da pynman ki ya kam kani ka jooh ka Public Hearing ha Wapung ya kawa da pynlai da u Deputy Commissioner ka Distrit, u F.M. Dopth ryngkat i emlang ki sahep ka District.
Discussion about this post