Shillong: I jied ya kiwa mihkhmat MLA wa thymme cha ka yung dorbar chna aiñ ka jylla da poi ko chawa kut ynnin ka sngi khlem em iwon iwon i jia wa sñiawsih ha waroh ki 59 tylli ki Constituency ka jylla.
I thap vote da sdang i nadooh i por 7:00 waje i step hadooh 4:00 waje i janmiet wei hapyrdi i sonteri wa khlan ym em iwon iwon i awri awra lait na i thut ki EVM hei step wei ha kam kini ki thaw wa thut ki EVM da pynyinsur ya i por thap vote.
Hanlada i thap vote da man i iwa lai bait da em leh i leh tooh ha North Shillong Constituency da ki kattu katni ki bru kiwa lai thap ya ki Vote ha i pyrtuid yong kiwi wei da chem yeini manda ki tre dalai ki cha polling station ha Jail road wow thap ya ka Vote yong ki.
Katkam ka yutip wa da yoh da ong wa ini da jia i neidaw wa ki Polling Agent ym em u bichaar bniah ki ya ki bru heipor wa lai thap Vote.
I jied ya kiwa mihkhmat ynnin ka sngi da man i ha ki 3015 tylli ki thaw wa kynthup ya 66 tylli ki Polling Station kiwa da booh kyrpang du neibynta ki kynthai ki wow rai neibynta kiwa mihkhmat yong ka jylla ha ki san snem wow wan na ki 361 ngut ki kyrtong wa kynthup ya ki 31 ngut ki manbei.
Napyrdi ki 3015 tylli ki thaw thap Vote 580 tylli toh kiwa ye u em hei ma wei 340 tylli won kiwa da kheiñ wa ma wei da sonteri ya ki da ki pulit CPF.
Kiwa jied ya kiwa mihkhmat da em ki 18,09,818 ngut heiwa ki kynthai em ki 9, 13, 682 ngut katwa ki chynrang won 8, 96, 136 ngut.
Khnang wow yawan kiwa thap Vote neiliang ka sorkar da rai ko wow pynman ya kani ka sngi kam ka chuti.
Discussion about this post