U District Election Officer, West Garo Hills da pyntip u wa ynnin i miet ka 7 tarik heipor kamwa 10:45 da mih i ya awri awra hapyrdi kiwa kyrchaan ka TMC wa NPP ha chnong Charbatapara hapoh ka 46-Phulbari Assembly Constituency.
Katkam ka khubor wa da yoh, da ong wa u S.G.E. Mominin (Ex-MLA kyrtong TMC), u Moni Mondol (TMC), Bhuttu (TMC) wa u Habibur Zaman (MDC/NPP) toh kiwa emlang ha ini i thaw wa jia.
Mar ya tip yeini, ki pulit ka Phulbari Police Station da lai ki cha ini i thaw yow pynjai-jai heiwa da phah ya 9 ngut yow lai cha Phulbari CHC kiwa da phah liwan hadien wa dep wow pait u sylli da ki Doctor.
Uwi u bru wa tip kam u Nojrul Hoque da phah lai cha Hospital neidaw wa rap takha joor u hei bynta iwa hajan i khmat.
Da yoh leh ki pulit ya ka FIR wa e da u Nozim Hussain, uwa na ka chnong Charbatapara uwa da pynbaad wa heipor wa pynman ya ka lai paidbah wa yahkhmat da u Habibur Zaman (NPP), da sangeh ki hajan i yung u wei da sdang ki wow kawang moo yei yung u heiwa da em 4 ngut kiwa da takha.
U District Election Officer da ong u wa i daw wa mih ini i awri toh wa heipor wa u Habibur Zaman wa kiwa kyrchaan u dang lai luti ki na kani ka chnong, da em kiwa kyrchaan ka TMC kiwa dat ka ka kari Scorpio ki iwa da pynpoi cha ini i awri awra.
Neiliang ki pulit ka Phulbari dang em ki ha ini i thaw wei da man i iwa jai jai.
Da pyntip leh wa em ki Video ha Social Media wa da pynpoor ki paidbah heiwa ya ini dang pynman takit.
Da phah leh ya u SDO wa SDPO deilang wa ki BDO cha ini i thaw deilang wa ki CAPF, wei ya kiwon kiwon kiwa pynkulmar daw pynngat hapoh ka kyndon CrPC 107.
Da em leh 3 Company ki CAPF ha waroh ki Plain Belt ka Garo Hills.
