Hadien wa mih ka khubor na Assam wa daw e ka sorkar Assam ya ka Pilangkata, Boklapara waka Langpih cha ka jylla Meghalaya kam chibynta i e wei chim kylliang yei thaw wa ya kajia khappood heiwa ynne ka sngi da pynman leh u Montri Rangbah ka Assam, u Himanta Biswa Sarma ya ka yalang waka AASU, ki seiñ ki Rabha, Garo wa ki Bodo deiwa emlang leh u CEM ka Rabha Hasong Autonomous Council, u Chief Secretary ka jylla wa kiwi de yow yaklam hajrong ki 6 tylli ki thaw kiwa suk wow pynbait pood na waroh ki 12 tylli ki thaw.
Ya kani ka yalang da khut neibhah kini toh ki jaitbru wa em ha kini ki thaw khappood yow thooh laad kammon wow pynbait syndon wei pynbait khaddooh noh ya u pood hapyrdi ki ar jylla ha ki 6 tylli ki thaw.
U Sarma da pyntip u wa da paan yei ya krehlang ya ini i kaam wa da sah da boon snem wei da yaklam hajrong ki thaw wa em ha Ratacherra, Tarabari, Boklapara, Khanapara-Pillangkata, Hahim wa Gizang. Deiwa pynrap wa ka luti wow lai chakhmat da pynkreh da ki 3 tylli ki Regional Committee wa em jar jiar ki jylla.
Chooh chooh da ong u leh wa dapoi chadooh ini hadien wa da yachem boonsien para Montri Rangbah ki ar jylla.
Neiliang u Sarma ym em ong u daw e ya ka Pilangkata, Boklapara waka Langpih cha ka Meghalaya heiwa ka Langpih ym pu em yaklam ya ka neibhah ym em ko hapoh ki 6 tylli ki thaw wa yaklam pynbait pood katni, tangwa neiliang u MLA ka West Guwahati, u Ramendra Narayan Kalita da ong u wa daw e kattu katni ki bynta kini ki le tylli ki thaw cha ka Meghalaya.
Neiliang won ka sorkar Meghalaya da ong ko wa ym pu tip yeini neibhah hap yang chwa chwa wow ye u ong deiwa tikna.
