Shillong: U MLA ka Nongkrem, u Ardent M Basaiawmoit hawa yachim bynta u ha ka yania haka dorbar wa kyrpang ynne ka sngi, hajrong i pynbna ka sorkar India wow pynkrehkaam ya ka Prevention of Cruelty to Animals (Regulation of Livestock Markets) Rules 2017, da pynsñiaw yei sñiaw artatien ya ka rai ka yung dorbar, wa ye ko namo ym ye u man sakhiat wow dawa naka sorkar India neibhah ha ki por nachwa ka rai ka yung dorbar ym em poi ko cheiwon cheiwon leh.
U Ardent da ong u wa oo kyrchaan bha u yei rai wow pyrchah joor ya ini i leh ka sorkar India, tangwa hadooh kini ki sngi ka sorkar pyrdi ym jooh ap ko yei dawa ka sorkar jylla, da kyntu u ya ka sorkar jylla wow booddien bha yeini yow pynman sakhiat yei dawa.
U MLA ka UDP na West Shillong, u Paul Lyngdoh da ong u wa sñiaw phylla bha u wa kani ka aiñ da pyrchah ko wow khyrwait tdong, khyrwait chkoor, wow biah sumrit ha ki khmat wei kamjooh wow tynyap masi.
Da ong u wa i thmu wow pyrchah yei baam wei wow chohdoh masi jooh jia ko nadooh ki por nachwa heipor wa man Montri Rangbahdooh u Moralji Desai ha ki snem 1978-79 wei kamjooh ha i por wa man Montri Rangbahdooh ka Indira Gandhi ha u snem 1982 kawa da pynmih ya i thoh cha ki 14 tylli ki jylla wa kynthup ya ka Assam wow thooh laad thooh luti ki wow khang yei pynyap kamjooh yei baam doh masi.
Neiliang u Saleng A Sangma da beiñ joor u ya ka sorkar pyrdi kawa pynmih ya kani ka aiñ kawa thmu wow ksih ya kiwa baam doh. Da ong wa kiwa chna ya kani ka aiñ kopsar du kiwa baam jhoor donhi.
Da ong u wa kani toh ka aiñ wa chna kiwa biej wow wanrah yei sñiaw phær hapyrdi ki jaitbru ha ka ri India.
U Dr. Jemino Mawthoh won da ong u wa ha ka jylla Meghalaya toh kawa baam doh masi bha palat ya ki jylla wa boon ki Muslim kam haka Jammu & Kashmir.
U James K. Sangma won da ong u wa ki kyndon wa kdaw ha ka tai ka aiñ toh kiwa sñiawphylla bha hadooh wow em ki luti wow lai ki masi hawa tang ki thaw lai ki khynnah skur hadooh kiwa duna ha ki dkhot i pran yong ki leh ympu ye ka sorkar wow pynbiang.
Discussion about this post