Ynne ka sngi ki paidbah naki chnong waphær waphær ka 4-Mawkaiaw Constituency, West Jaiñtia Hills da ya mih ki kynthai wa chynrang u pynchna yow sarok nadooh laad chnong Mushrot ter ter hadooh wow poi Laskeiñ.
Heini i pynchna yow sarok da yahkhmat da u Nehemayah Tyngkan deilang ki lok yong oo, deiwa pyndap khyndaw wow moo ya ki thlu ki syar neitæ won da pynloor haroh ki da ka Roller khnang yow suk ki paidbah wa lai wa wan.
Hei yaklam wa u Nehemayah Tyngkan khana u i daw wa pynman ya oo u chim ya kani ka luti toh hadien wa sñiaw u yei ood i naam ki paidbah wada chem chitom ki u lai u wan khamtam hei kjut chitom neidaw wa sih uni u sarok u wym em de pynmiat da boon snem, wei wada yoo hi u leh dei khmat.
Heijooh i por sñiawkmen won u wa ki paidbah kiwa kyrchaan yong oo wa jooh e mynsien wa naki chnong waphær da wan chimbynta lang ki u yarap pynchna ya uni u sarok.
“Wym artatien wa lym ye u pyndep lut myntu leh tangwa mynstep mankawi katwa ye u pyndep hadooh wow poi Laskeiñ, wei ki chnong wa lai luti lyngba uni u sarok wym duna ki ya 15 tylli,” ong u Nehemayah.
