U Himalaya M Shangpliang hadien boon bnai da suba wa daw mih noh u naka BJP, ynne da e u ya ka chithi wow mih noh napoh ka Party chisyndon.
U Himalaya uwa man kam u MLA warim ka Mawsynram uwa da psiah cha ka BJP ynnin u snem yow yaleh Election tangwa da rem noh u. Ha ka chiti mih noh na ka Party da pynsñiaw u yei sñiawngooh wei burom ya u Prime Minister ka ri, u Narendra Modi wei deiwa yaroh yei yahkhmat u da psiah u leh cha ka BJP deilang wa kiwi kiwa na Garo Hills ha ka yalang wa da pynman ha New Delhi.
Tangwa hadien ka Election ym em da lai ko kamwa da thmu, da neh u hapoh ka BJP yow kreh neibynta i heh i san ka Party hapoh ka Meghalaya wei da thung ya oo kam u Party Spokesperson deilang wa kiwi ki MLA warim kiwa da psiah cha ka Party wei da lai rah ki ya ki phang wa emkaam hakhmat ki laad pathai khubor neibynta ka Party.
Da ong u leh wa da leh chitom u wow yaklam ha ki yalang wa da pynman da ka sorkar hajrong ka State Reservation Policy.
Da lai yaklam u leh wa u State President da boonsien ya ki kaam yow pynheh pynsan ya ka Party ha Meghalaya khamtam ha ki thaaiñ palatsor wei da e buit leh kammon u leh yeini deiwa pyrkhat yei rem tput ka Party ha ka Election wa dang dep ha Meghalaya.
Da ong u leh wa hanla da yaklam da boonsien wa u State President yeiwa emkaam u leh yow pynkhlan ya ka Party hapoh ka jylla tangwa da em i leh chiliang hapoh ki heh ka BJP Meghalaya nadooh nachwa hadooh katni, khamtam hapoh i yahkhmat u President ka State BJP iwa daw ktah ya waroh kitu kiwa em mynsien wow kreh chitom wei kiwa kwah u klam ya iwa emkaam ki u leh yow heh u san ka Party.
Na kini ki daw da mih noh u Himalaya Shangpliang na ka Party deiwa ong leh ha i jooh i por wa man i daw samen yong oo.
Katkam ka tyllong khubor wa da yoh lum, da khana wa hadien wa mih noh na ka BJP, u HM Shangpliang ryngkat wa kiwa kyrchaan u na Mawsynram ye ki wow lai psiah kam ki dkhot pura cha ka NPP ha ka 13 tarik uni u bnai.
Discussion about this post