U Montri warim ka sorkar pyrdi u Ashwani Kumar, ynne ka sngi da mih noh u napoh ka seiñ Congress hadien 46 snem deiwa ong wa pyrkhat u yei burom yong oo.
U Ashwani Kumar da man u man u Law Minister ha ka sorkar Congress u Manmohan Singh nadooh u snem 2009 hadooh u 2014.
Ha ka chithi mih seiñ da ong wa hadien wa da pyrkhat bha da sñiaw u wa iwa man katni ym yahaap de wa i burom yong oo wei ye u wow chakri rap bha ya ka ri deiwa em cha baar ka Party yow poi cha ka thong wa da seiñ ya ka ri wei katkam wa angnood kiwa yaleh laitlooid ka ri.
Da ong u leh wa ka Congress ym em de man ko ka Party kam nachwa dei wym em de kiwa yahkhmat kiwa ye wow e mynsien wow wanrah yei kylla deiwa pynrap wa ym em ieh u ya ki kaam saiñhima wei u pteiñ u wow kreh neibynta ka ri.
Da kdaw u leh yei duna ki Vote wa yoh ka Congress iwa pynyoo wa ym ye u pynyatoh wa i rukom pyrkhat ki bru ka ri.
I mih u Ashwani da wan i leh hadien wa mih u RPN Singh uwa jooh man kam u Montri ka sorkar pyrdi wei uwa yahkhmat wa heh ka Uttar Pradesh.
