I thap Vote neibynta ka Election chiteiñ samoi ha 13 Mawryngkneng Constituency da lai ko chaaid chaaid nadooh i step, wei ha kani ka sngi da sakhi yei mih ki paidbah wow jied ya uwa mihkhmat, wei napyrdi kiwa thap Vote da em leh kiwa da heh rta bha, wa kynthup ya ka men Justina Kharumnui kawa da jan dap 100 snem i rta, kawa da chim yei kitkhlieh wow lai thap Vote ynne ka 30 tarik.
Da pynman ya ka Election chiteiñ samoi ha Mawryngkneng toh hadien wa khlaad noh u MLA, u David A Nongrum. Ka Mawryngkneng Constituency em ko du 36751 ngut kiwa thap Vote ha ki 60 tylli ki Polling Station. Ki paidbah yong kani ka Constituency da e ki ya ka rai ynne ka sngi yei yi u pynman kam u MLA wa thymme wei kawa daw pyndep ha ka 2 tarik u Khonchonglad (Nov) yow tip uyi wow jop.
Neiliang yong ka chnat Elelction da booh ko ya ki bor ka aiñ yow sonteri ya ki thaw thap Vote yow lai bait ka Election wei kamjooh ya ki laad yada katkam wa da phah yow lait nei yabi u khñiang COVID-19.
Ha Mawryngkneng da em 5 ngut ki kyrtong kiwa da mih chakhmat wow e reiñ ha kani ka Election chiteiñ samoi, kitæ u Highlander Kharmalki na ka seiñ Congress, u Pyniaid Sing Syiem na ka NPP wa le ngut ki kyrtong samen.
Kam wow pynkynmoo wa ha ka MLA Election kawa man ha u snem 2018, ka seiñ Congress da yoh ko yei jop lyngba u David Nongrum uwa da yoh 10336 Vote pyrchah ya u Highlander Kharmalki yong ka PDF uwa da wan wa ar uwa da yoh 6573 Vote.
