U Working President ka Meghalaya Pradesh Congress Committee (MPCC), u James Lyngdoh da pynbaad u wa da jia kiwa boon jiat hadooh wa poi chei thung ya u Vincent H. Pala kam u President iwa da pynman ya oo wow chim yeini i rai wow mih noh napoh ka Party.
U James Lyngdoh da ong u wa da psiah u hapoh ka Congress ha u 1988 wei da em u hapoh ka Party la 33 snem deiwa ksoh ya kiwa boon ki kyrdan.
Da ong u leh wa i tlot ka Party da sdang i nadooh ka 31-12-2017 chwa wow pynman ya ka Election MLA 2018 hadien wa uwa da rim, da heh uwa jooh leh man kam u Montri Rangbah warim, u D. D. Lapang da phah ya oo da ka AICC wow hiar chuki u kam u MPCC President heiwa da thung da u Celestine Lyngdoh heithaw yong oo.
Da ong u leh wa hadien wa chimkti u Celestine, ka Party da rai ko wow e ya ki Form chwa kiwa kwah wow yaleh Election hanla ya ki kyrtong da dep chwa wow jied.
Da kdaw u leh wa u Celestine kam u President ym em lai yalap MLA Election u, ki Election MDC wa ki Election MP wei tang u psiah u leh ym jooh em hapoh ka yung krehkaam ka Party.
U James da beiñ u leh ya u MPCC President wa katni, u Vincent Pala wa kynran dien u na iwa da rai ka Party chwa ka Election MP ha u 2019.
“Da dep i wow rai wa kam ka Party wa kiwon kiwon ki MPC Scheme toh u pynlai lyngba ka Block Congress Committee. Tangwa hadien wa jop u Pala, da e u ya ki Scheme cha ka Mylliem waka Sohra khlem da tip ka Block Congress Committee,” da ong u James.
Chooh chooh da ong wa hadien wa thung ya u Pala kam u heh ka Party hapoh ka jylla da kheiñ rood hi-eh ya oo.
“I kreh yong nga leh kam uwa pait ya ki kaam ka Party leh da chah knieh. Ym em de ya nga wa hap O wow leh kamtæ da mih O yow lai thooh kreh,” da ong u James Lyngdoh.
Da pynbaad u leh wa ka Party da pynrem chynnam ko ha waroh leh tylli ki Constituency ha kani ka Election chiteiñ samoi wa dang dep pynman.
Da kylli u leh wa neiyi i daw wa ka State Unit ka Party da jied ko ya ka Ampareen Lyngdoh kam ka Convenor ka Mawrynkneng hawa u Charles Pyngrope, u MLA warim ka Constituency wa u pa u (L) David Nongrum dang em hi u.
“Kwah ki wow rem yow pynbor ya u Charles Pyngrope wow yakhun na Mawryngkneng ha u 2023. Yeini da pynsakhiat deiwa thung ya u R.G. Lyngdoh kam u Adhoc President ka Nongthymmai Block Congress Committee,” da ong chooh chooh u James Lyngdoh.
Da pynbaad u leh wa u Pala da booh u charood ya u Himalaya Shangpliang wa u George Lyngdoh hadien wa man u kam u MPCC President.
