Kiwa yahkhmat wa ki dkhot yong ka National People’s Party (NPP) ka Nongpoh Constituency ynne ka sngi da pynbna syndon ki wa da mih noh naka Party neidaw ki kaam sop sop yong ka Party iwa da pyndiaw mynsien ya waroh, heiwa da pynsñiaw ki leh wa kiwa yahkhmat ka Party da kheiñ khynnah ke khlem da burom de yei kreh chitom yong ki neibynta ka Party nadooh ki snem wa da lai.
Kiwa yahkhmat ka NPP na katai ka Constituency da chim ki ya ini i rai wow mih na ka Party du chi sngi hadien wa ka Party da pynbna ko wow pynyieñ da ka MDC yong ka Umsning, ka Macdalyne wow yakhun ya ka Election MLA na Nongpoh ha u 2023.
U President yong ka NPP Nongpoh Block da ong u wa i leh kiwa yahkhmat wa rap haneiñ da pynkthang i. Uwi won uwa yahkhmat da pynsñiaw u wa i e Ticket ya ki kyrtong toh u man na Block næ Constituency, tangwa katni ym em lai lyngba yong ki wei da pynbna bait yaka kyrtong, wei ini pynyoo wa da kheiñ ya ki wakreh ka Party ha Nongpoh kam ki khynnah ki wym pu tip wow krehkaam.
Ka President ki manbei ka NPP da ong ko wa ym pu kwah ki wow mih na ka Party neibhah ki toh kiwa prat luti, tangwa katni da chah kheiñ beiñ khlem da kheiñkor ya ki.
Haka yalang kawa man ynne i janmiet kiwa yahkhmat yong ka NPP wa ka NPYF Nongpoh, khlem da pynslem da rai wow mih noh na ka Party, wei kini kiwa yahkhmat kynthup ki ya u Agustine Wahlang President Nongpoh Block NPP, ka Delis Mallai President Nongpoh NPP Women’s Wing, ka Doristar Kleiñ Secy. NPYF Nongpoh, u Arbingstone Syiem President NPYF Nongpoh, u Henry Nongrum Organising Secy., u S.A. Ranee Vice President wa kiwi de kiwa yahkhmat wa hakhmat dooh yong ka seiñ NPP Nongpoh Constituency.
Puræ leh: Psiah NPP arngut ki MDC ka KHADC- ka Grace wa u Fantin
