Mih yakhih kiwa kreh ka JHADC hadien wa jan dap chi snem khlem yoh tulop

Kiwa kreh ka JHADC hapoh ka lama yong ka Jaiñtia Hills Autonomous District Council Staff Employee Association ynne ka sngi da mih madan biang ki ha pchem ka yung krehkaam ka JHADC deilang i rah Placard hadien chisnem tam yow dawa ya ka tulop wa sahteiñ yong ki nadooh u Kmaichonglad (Dec) 2022.

Kam u pynkynmoo wa ha u Naiyniaw u snem 2022 da em i sien wa ka seiñ kiwa kreh JHADC da hap ki wow paanmaap naki bor wa hakhlieh hajrong i mih yong ki chakhmat wow klam yow dawa pynyoh tulop chwa ka Behdieñklam kamwa kular u Montri Rangbah, u Conrad Sangma heitai i por.

U President ka JHADC Staff Employee Association, u Johnson Pohrmen khana u wa i paanmaap yong ki heitai i por toh neidaw wa chah pynbor ki khnang yow lait ka tulop yong ki wei du hadien kattu katni sngi ka tulop yong ki lait wot ko kamwa Rs. 35 klur.

Kamtæ hadien wa yoo ki yei sahteiñ ka tulop kawa da pteiñ biang na ki bnai cha ki bnai, wot hadien i kular pynlait u Montri Rangbah khamtam wot u Symbood Montri Rangbah, u Sniawbhalang Dhar dang ha ki kajiak bnai da wan hiar u ha JHADC yow ap u sñiaw yei eh i khoo yong ki hantæ ym em mankaam iyi hadooh katni.

Related posts

Ka sorkar ymtoh kawa ye hi-eh ka KSP wow maham: Sniawbhalang

December 21, 2024

Da u waheh chnong uwa man leh uwa yahkhmat seiñbalang sai kyrtong MDC ka Namdong

December 21, 2024

“Neini chakhmat ham pynbor de ya i deini deitai yow randien i hajrong i hok, tangwa da rai i wot lada ka sorkar pynchitom ko i ha iwon iwon i rukom leh da hun i,” da ong u Johnson Pohrmen.

“Wym toh i kiwa yaleh pyrchah sorkar, tangwa man i kitæ ki chakri sorkar, i toh ki bru wa dap ram haki liang waroh wei wot ki Bank leh wym chaniah de ki i wow e ram.”

Da pynrap haroh u deiwa ong khlem ka poisa i eh i khoo da syrtap chwa i, la heiyatoh u pynbiang yei baam i dih, i puræ puthi ki khon, i jynjar chitom hawa kjut wa kiwi kiwi de wa emkaam.

Wei lada ka sorkar ym ap ko, da rai ki wow pyrkhat u chim da kiwi won ki laad ki luti, wei la toh wa dawa u lum yaki paidbah ka Ri-loom Jaiñtia leh hap ki wow leh yeite.

Tangwa khnang yow lait na iwon iwon i jia wa sñiawsih ya kiwa kreh ka Council, ki kaam ka Council u man ki kiwa lai bait lai ryntih deiwa kyrpaad ki yaka sorkar wow su lut ko ya waroh ka tulop wa sah yong ki.