Shillong: Ka Meghalaya Cabinet ynne ka sngi da mynjur ko yaka Draft ka Meghalaya Drug Abuse Prevention Policy.
Hawa pyntip cha kiwa thoh khubor hadien wa kut ka Cabinet Meeting, u James Sangma da ong wa ka jylla ym pu em ko yaka Drug Abuse Policy wei kani ka kaam toh kawa khia bha kawa da emkaam wow yaleh pyrchah yaka heiwa i drug da ktah ko ya ki khynroo yong i kamjooh yaka imlang sahlang wei kani ka Drug Abuse Prevention Policy 2020 u krehkaam ko nadooh myntu ka sngi.
U James da ong u wa kani ka Policy toh kawa da em nadong chadong nadooh wow yada, u sumaar, u e yarap ya kiwa da yaleh wow im dei thymme kiwa yaleh pyrchah yei chah kdoh chah khoom ha i dih drug.
Ka Cabinet da mynjur ko leh yaka Meghalaya Identification Registration Safety and Security of Meghalaya Workers Bill, 2020.
U James da pyntip u leh wa kani ka Bill u pyntikna ko wa daw em ka aiñ ka wow pyntikna wa ym hoi u dam u Register ya waroh ki wakreh wa wan na baar jylla.
Da ong u leh wa kani ka Bill u wai laad ko yow booh yutip (Record) ya ki wakreh da kiwa pynkupbor da ka sorkar wei daw e leh yaka Identity Card ya uwi pa uwi u wakreh wa wan na baar jylla uwa em hapoh ka jylla.
“Ka thong leh man ko kam wow yada wei wow em i chngaiñ kiwa na baar jylla kiwa wan kreh yow lait ki nei chah pynthut pyndik. Wei lada em wa jia ya ki, da em ki kyndon wa ye ka aiñ wow tuklar, i wow leh da ki bor ka sorkar,” da ong u James.
Discussion about this post