March 12, 2020

Ympu em u kem ki pulit ya u sordar ka Syntung wa da chah pynbaad ha uwi na ki khynroo: SP, EKH

Advertisement ad1

Shillong: Ka Superintendent of Police, East Khasi Hills, ka Claudia A Lyngwa da ong ko wa ymye wow kem donhi ya u sordar ka chnong Syntung, ya uwa da chah pynbaad ha uwi na ki khynroo wa emkti u wow thombor ya ki ha ka 8 tarik.

Ka SP da ong ko wa hanlada uni u khynroo da kdaw u wa u sordar ka Syntung, u Robert Pale da emkti u wow thombor ya ki, tangwa ki pulit ymye ki wow kem ya koo neibhah wa ya kani ka kaam daw bichaar da ki Magistrate katkam ka Section 164.

Da pyntip ko leh wa ki pulit da kem ki ya ki 27 ngut wa suba wa emkti ya kini ki 9 ngut ha chnong Pashang iwa da wanrah yei yap uwi. Napyrdi kini ki 27 ngut ya ki ar ngut da pyllait noh neidaw wa uwi toh uwa dang khian rta katwa uwi won toh uwa da tymmen wei hadien i takit da pynlait noh ya u sordar neibhah wa da chem wa da yarap u wow yada ya kini ki khynroo nei chah thombor.

Ka SP da ong ko leh wa ki pulit da kem chwa ki ya ki 18 ngut wei hadien wa kdaw kini da kem noh sa ya kiwi tawon wei dang takit bniah bha ya ki 24 ngut kiwi tawon.

Hawa kylli wa em kiwa chah tyrrah da ka kari kini ki khynroo, ka SP da ong ko wa da yoh yutip wa kiwa chah tyrrah em ki hapoh hospital, tangwa hadooh ynne ka sngi ympu em ujor ki cha ki pulit, deiwa pynrap leh wa ini i chah tyrrah ye i u man wa kini ki paidbah da patah ki ya uwa yah ka kari (ki khynroo) hapyrdi ini i awri.