Shillong: Ka Meghalaya Legislative Assembly ynne ka sngi da mynjur ko yaka rai (Resolution) wow kyntu yaka sorkar India wow pynlait yaka jylla Meghalaya waroh kawi ym du ki thaw wa haap hapoh ka 6th Schedule naka aiñ Citizens Amendment Act, 2019.
Ya kani ka Resolution da wanrah ynnne ka sngi wa ar ka dorbar mang tyngka da u montri rangbah u Conrad Sangma uwa pait leh yaka chnat Political Department.
Katkam i ong u Conrad, ya kani ka Resolution da wanrah yow yada yaka jaitbru ri-loom ka jylla.
Ka Citizenship Amendment Act, 2019 kawa da mynjur ha ka 12-12-19 krehkaam ko haki thaw wym toh kiwa em hapoh ka 6th Schedule.
Kini kyntup ki yaka Municipality ka Shillong katkam wa da kdaw haka Paragraph 20 ka 6th Schedule ka riti synchaar, iwa man kamwa 2 Sq.km naka 23,000 Sq.km i thaw ka jylla iwa kynthup ya 4 tylli ki Wards na ki 27 tylli ki Wards wa em ha ki thaw Municipal.
“Ka Shillong Municipal em ko 27 tylli ki Wards heiwa 23 tylli haap ki hapoh ka 6th Schedule ka Constitution. 4 tylli ki Ward kitæ ki Ward 7, 8, 9, 10 kiwa em waroh i heh 2 Sq.km em ki cha baar ka 6th Schedule kiwa man kamwa 0.0001% ka jylla waroh iwa ym toh kamwa da mut nachwa wa 3%,” da ong u Conrad.
Hawa jubab yeiwa kylli ka liang pyrchah wa ileh wym wanrah yaka Resolution wow kyntiat yaka CAA waroh kawi hapoh ka dorbar, u Conrad da ong u wa ka jylla ym em ko i bor wow kyntait yaka aiñ wada mynjur daka Parliament.
“Tangwa ye i wow kyntu yaka sorkar wow pynlait ya i na kani ka aiñ,” da ong u, deiwa pynrap wa hadien wa mynjur ya kani ka aiñ ym em leh uwi wa wan chakhmat wow yaleh man tre ri (Citizenship) hapoh ka jylla katkam kani ka aiñ.
Ki Congress ka MLA da wanrah ki yei kylli heiyatoh wa kini ki kajiak Ward wa em chalait ka 6th Schedule deiwa kam toh iwa daw pynpiah yaka sor Shillong. Hawa jubab ya ini, u BJP MLA na Shillong South Constituency u Sanbor Shullai da ong u wa ki Cantonment Area waki European Ward da em chwa ki chalait ka 6th Schedule nadooh u 1952 wei ini ym toh iwa thymme.
Uwa yahkhmat ka liang pyrchah, u Dr. Mukul Sangma da ong u waka sorkar pyrdi waka Party ha Delhi da jop ki wow pynpiah yaki paaid ka North East. “Katni da klam i du yei bhah yong i. Ym em pynsawa i ya i sur yong waroh ka thaaiñ. Ini man ko iwa maa bha iwa da sdang nadooh wa wan kani ka aiñ,” da ong u Mukul.
Neiliang won u Congress MLA u George B Lyngdoh da ong u wa ini waroh toh du i leh na sla donhi wei ym em klam yei ktah kani ka aiñ. Da kyntu u yaka dorbar wow dawa naka sorkar pyrdi wow pyndooh ya kani ka aiñ CAA.
Discussion about this post