Jowai: Ka Jaiñtia Hills Autonomous District Council (JHADC) haka dorbar tlang kawa da pynman ynne ka sngi da mynjur ko wow kyrpaad yaka sorkar bei wow pynpsiah ya kiwa synchaar chnong wa Elaka ha i pynkylla næ Amendment yaka Article 280 yong ka riti synchaar (Constitution) ka ri India.
Ka Article 280 ka batai ko chaphang i e bor yaka Finance Commission wa neini chakhmat wow kynthup lang yaki Elaka waki Dorbar Chnong wow yoh bhah yaka poisa iwa daw yarap wow pynku leh yei bhah poisa wa toh u yoh ka JHADC neibhah kamwa man kattæ ym em kdaw hapoh ka Article 280 chaphang ka District Council, ki Elaka wa Dorbar Chnong, heiwa u yoh bait yaka poisa namo ka Direct Funding naka Finance Commission cha ki chnat krehkaam yong ki District Council hapoh ka jylla.
U Chief Executive Member ka JHADC u Thombor Shiwat da ong u wa i wanrah ya kani ka Resolution toh hajrong ka yurim wow kyrpaad pynmih yaka Sub-clause (Ca) hapoh ka Clause (3) haka Article 280 yow booh lang yaka District Council wa kiwa synchaar chnong kiwa pait daka Council katkam wa da tyrwa daka Finance Commission ka jylla.
Hajrong ini da ong wa ka JHADC ka emkaam ko wow yoh kyrchaan naka sorkar jylla neibynta wow pynlai ryntih yaki riti dustur yong ki jaitbru Pnar wa da yahkhmat daki khlieh wa synchaar wa da jied katkam ka dustur riti hapoh i pait yong ka District Council.
Chwa wow mynjur ya ini da em leh i ya phyllu yumut hapyrdi ki dkhot yong ka yung dorbar.
Ini i pynkylla yaka Constitution da wanrah hapoh ka “Constitution (One hundred and twenty-fifth amendment) Bill, 2019” hawa yatoh waka Finance Commission kawa da wanrah hapoh ka Rajya Sabha haka 06-02-2019 kawa da phah cha ka Standing Committee ka Home Affairs yow chong bichaar bniah chwa yaka.
Ya kani ka Resolution ka JHADC u phah cha u Lat ka jylla wa cha u Montri ka District Council Affairs, u Secretary General, Rajya Sabh wa cha u Commissioner & Secretary ka sorkar Meghalaya, District Council Affairs Department.
