U Montri wa pait ya ka chnat puræ puthi ha ka jylla, u Lahkmen Rymbui da ong u wa ka jylla da mynjur ko yei thmu yong ka Ministry of Education ka sorkar pyrdi wow pynman ya ka Exam yong ka Central Board of Secondary Education (CBSE) hapyrdi yong ka khlam, heiwa ka tarik daw pyntip rap hadien.
Katkam wa pyntip u Rymbui, ka Ministry of Education yong ka ri India da phyllu yumut ko wa ki Montri wa pait ya ka chnat puræ puthi yong waroh ki jylla ka ri India heiwa da emlang leh u Montri Yada Ri, u Rajnath Singh wa u Montri ka Puræl Puthi, u Ramesh Pokhriyal wei kamjooh u Montri ka chnat Information & Broadcasting. Wei da pyntip u wa da yaklam sani bha heiyatoh wow pynman ya ka Class XII (CBSE), heiwa aw jan waroh ki Montri da pynsñiaw ki wa Exam Class XII man ko kawa emkaam bha, wei wow pynman bait ya ki.
Da pyntip u wa kani ka Exam daw rap phær ko ha uni u snem, heiwa ki Subject daw pynduna deiwa pynyakhun du kiwa emkaam, ya i por wa ki khynnah u thoh ki ya ki Exam leh daw pynduna na ka 3 kynta wei ya ki Examination Center leh daw pynboon chooh chooh. Wei da e por wow e yumut hadooh ka 25 tarik uni u bnai lada dang emkaam wow pynsñiaw cha ka sorkar pyrdi.
Hawa yatoh wa ki Subject wa dang sah yong ka Class XII Exam MBOSE, u Rymbui da pyntip u wa da pynsñiaw hakhmat ka sorkar pyrdi hajrong wa hap u pynsangeh noh chwa ya kani ka Exam. Da ong u wa ka chnat daw pynman biang ko ya kani ka Exam manda rap miat i long i man.
Da pyntip u leh wa em kiwa dooh wow yaleh pyndep ya ka Exam Class X neidaw wa chah khang ha ki Containment Zone wa kiwa yajan wa kiwa yoh ya u khñiang khlam, wei neibynta kini leh ka sorkar daw pyrkhat biang ko hadien wa sdang miat i long i man.
