Ka sorkar jylla ynne da mynjur ko wow wanrah thymme yaka Rule 286 (A) and Rule 316 (A) Sub Section (1) to (22) yow e License yaki dukan dai kiad (Wine Shop) yow pynpoi kiad hadooh ha yung bru (Home Delivery) hapoh ka aiñ Meghalaya Excise Rule (Assam Excise Rule, 1945) katkam wa da pynkylla da ka Meghalaya.
Ki dukan dai kiad kiwa ye u yoh ya kani ka License, daw hap ki wow su T. 50,000 chi snem.
Uwa e ktien ka sorkar jylla u James Sangma da pyntip u wa ya ini da mynjur daka Cabinet, wei ki dukan dai kiad kiwa da biang ka License hap pyntip ki cha ka yung krehkaam ki Deputy Commissioner kamjooh leh yaki bru kiwa toh wow pynpoi kiad cha ki yung.
“Ki dukan kiad toh u pyntikna ki wa ki paidbah wa kwah kiad ha ki yung toh u em ki 21 snem i rta wei toh u leh ki ya ini lyngba ki kot ki sla ha i por wa thied kiad,” da ong u James Sangma.
U James Sangma da ong u leh wa ki dukan kiad toh u dai ki du 3 liter i kiad phareng wa 4 tylli ki Beer cha uwi u bru.