Shillong: Ka dorbar tlang ka yung dorbar ka Khasi Hills Autonomous District Council (KHADC) kawa man ynne ka sngi, da mynjur da iwi i sur wow chim ya ka rai wow pyrchah ya ka Citizenship Amendment Bill (CAB) ka sorkar pyrdi.
Ki dkhot na i liang synchaar wa neiliang pyrchah da pynsñiaw ki ya i jooh i sur wow pyrchah ya ka CAB.
Da wanrah ya kani ka phang neiliang ka Executive Committee da u Executive Member u Titosstarwell Chyne wei da kyrchaan da ka yung waroh.
Ka rai man ko wow kyntu ya ka sorkar pyrdi wa ka aiñ CAB ym toh wow pynkrehkaam ka ha ka jylla Meghalaya wei kyrpang ha ki thaw wa haap hapoh i pait yong ka District Council.
Hawa wanrah ya kani ka rai, neiliang yong u EM wa toh u pait ya ka khyndaw ka chyiap u Titosstarwell da ong u wa lyngba kani ka rai yong ka yung dorbar daw phah cha ka sorkar pyrdi wow pynsñiaw yei pyrchah ya ka CAB kawa ka sorkar BJP thmu ko wow pynman aiñ katni.
Neiliang u Ronnie V Lyngdoh u MDC ka Congress na Mylliem, da ong u wa lada kani ka CAB yong ka BJP u krehkaam ko, daw man ko i maa yaka jaitbru wa khian paaid.
Da kynthah u leh yaka UDP deiwa ong wa em ko hapoh ka NEDA wei da toh u ong ko ya u Himanta Biswa Sharma uwa yahkhmat ka BJP wa ki pyrchah ki yaka CAB wei lada u pyrchah u yaka CAB, oo leh (u R V Lyngdoh) daw psiah u cha ka NEDA.
Kiwi de kiwa chimbynta toh u Paul Lyngdoh uwa da ong iyi i myntoi ka lama UDP katæ ka lama Congress wa kiwi kiwi lada kani ka CAB krehkaam ko wei lada ka sorkar pyrdi leh embor ko.
Kiwi de ki para MDC kiwa da ya chimbynta wow klam toh u Chief Executive Member u Teinwell Dkhar, u MN Mukhim, u Lambor Malangniang, u Bindo M Lanong uwa da ong wa ki seiñ ri-loom na North East ki pyrchah ki ya ka CAB wei ya ini da yaklam haka yalang yong ka NEDA ha uni u snem ha Guwahati.
Kiwi kiwi de kiwa chimbynta toh uwa yahkhmat yaka liang pyrchah u Lamphrang Blah, u Batskhem Ryntathiang, u Carnes Sohshong, u Charles Marngar, u Gabriel Wahlang waka Grace Mary Kharpuri.
Discussion about this post