Mynjur ka yung dorbar ya ka rai wow dawa pynkrehkaam ya ka ILP ha Meghalaya

Shillong: Ka dorbar kyrpang ka yung dorbar chna aiñ ka jylla Meghalaya ynne ka sngi da mynjur wei pdiang ya ka rai wow pynkrehkaam ya ka Bengal Eastern Frontier Regulation 1873 næ ka Inner Line Permit (ILP) ha ka jylla Meghalaya.

Ya kani ka rai wa da wanrah da u montri rangbah ka jylla u Conrad K Sangma, da pdiang da waroh 60 ngut ki dkhot ka yung dorbar ynne ka sngi hadien ka yatai wa palat soo kynta.

Ka Congress kawa em ha ka liang pyrchah da pdiang ko ya kani ka rai deiwa pynsñiaw leh wa emkaam chooh chooh ki aiñ wa rap khlan wow yada ya ki jaitbru ri-loom ka jylla.

Hawa wanrah ya kani ka rai, u montri rangbah ka jylla u Conrad K Sangma da ong u wa ka sorkar daw lai rah ko ya ini cha ka sorkar pyrdi wow yaklam khnang wa u President ka ri yow soi noh u ya ka khnang wa ka ILP u krehkaam ko ha ka Meghalaya. Katkam i ong u montri rangbah, ka ILP ym emkaam wow lai paan ya ka mynjur na ka Parliament, tangwa du dei pynbna wa i soi u President ka ri, da biang wow krehkaam ha kani ka jylla.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

U montri rangbah da ong u wa ka sorkar ym chong ngiah ko wow yakhun wow dawa pyllait pura ya ka Citizenship Amendment Act 2019 na ka jylla Meghalaya neibhah wa hadooh katni dang pyllait du ya ki thaw wa haap ha ka Sixth Schedule kiwa man 97%.

Hajrong i klam ka Agatha K Sangma wa kyrchaan ya ka CAB ha Parliament, u Conrad da ong u wa ha i klam yong ka MP na Tura ha Parliament, kawa ong wa e khublei ya ka sorkar pyrdi kawa da ap chkoor ya i dawa wow pyllait ya ka CAB, ha i jooh i por da dawa ko leh wa toh wow pyllait ya ka CAB na waroh ka jylla Meghalaya wa ka thaaiñ mihsngi.

Ha i jooh i por, u montri rangbah da ong u wa da em i yaklam wa ya ka Meghalaya Residents Safety and Security Act (MRSSA) wow pynkrehkaam noh syndon, tangwa da kwah u wow pyntip wa kani ka aiñ da man aiñ ha u snem 2016 wa ha u snem 2018, ka sorkar da chim ya ki laad ki luti wei i ong wa ka sorkar ym em leh ko iyi iyi leh ym toh iwa sakhiat.

U Conrad da pyntip u wa ka sorkar da chna ko yaka Task Force wei hadien ini da chim ya ki laad ki luti wow pynlai ya ka kaam wa iwa wa eh toh wow yoh ya i thaw wei kani ka sorkar da ye biang ko wow sdang ya ka kaam ha Ri-Bhoi, Umkiang, Bajengdoba, Mendipathar heiwa da lai 80% ki kaam kiwa man ki thaw wa boonkam næ boon kiwa psiah wa mih.

Da kynthah u ya kitu ki dkhot ka Congress kiwa klam artatien wa ka ILP ym ye ko wow yada ya ka jylla deiwa ong wa kam kini ki jait klam yoobeiñ ya ki paidbah wa kwah ILP.