Hadien wa ka KSU Laban Circle ha ka 9 tarik uni u bnai da lai e dorkhat ko ha u Chief Engineer ka PWD (Roads) yow pynsñiaw yei pyrchah hajrong i chna ya ki Pandal Puja kiwa da poi cha sarok deiwa tymmoh leh ya u sarok neidaw wa wanrah yei khynnia kari kamjooh i thut i lai i wan.
Heiyatoh wa ini neiliang ka yung krehkaam ka Deputy Commissioner hei yahkhmat ka D. Kharshiing kawa pait ya ka thaaiñ Laban da khut yalang ko ynnin ka 13 tarik ha Laban Police Station heiwa da emlang leh kiwa yahkhmat ka Laban Puja Committee waka Central Puja Committee, kiwa yahkhmat ka Dorbar Chnong Laban, kiwa mihkhmat ya ka PWD, u OC ka Laban Police Station wa kiwa yahkhmat ka KSU Laban Circle.
Ka KSU da ong ko wym yahaap hi u chna Pandal chadooh ki sarok PWD wa pynemkaam da ki paidbah.
Neiliang ka Laban Puja Committee da mynjur ko yeini wei ym chna de ya ki Pandal ha ki sarok wei da kular leh wow pynboon ya ki Volunteer yow lait u khynnia ki luti syngkieñ, yow pait wa ka leh niam u lai bait lai ryntih ko khlem i pynthut ya uwon uwon leh.
Neiliang ka seiñ da booh ko leh yei maham ya ka Puja Committee wa nyngkong toh u pait ko yei khooid i jngiar ha ki thaw leh niam wym toh u noh roi yei jhep wei ymthoh u pynheh sur palat yei por wa da booh da ka Deputy Commissioner.
Da phah leh ya ka Puja Committee wow pynbna lyngba ki laad pathai khubor wym toh u em kiwa muaid kiwa wan pynkulmar hapoh ka chnong ka thaw neibah da jooh chem wa heipor Puja wa em ki kattu katni kiwa jooh chim kabu wow yachoh yadat wei pynkulmar leh ha ki chnong ki thaw wei jooh jia leh i ya tyrrah kari heipor miet neidaw wa dih muaid ki bru wa wan Puja.
Discussion about this post