Ka KSU Narpuh Circle ynne da pynsñiaw ko yei pyrchah ha ka Public Hearing wa da pynman da ka Meghalaya State Pollution Control Board (MSPCB) neibynta wow pynheh ka Star Cement yei thaw tih moochuni ha Brishyrnot wa tip kam ka “Brishyrnot Limestone Deposit-II” iwa heh 65 Hectare.
Ka seiñ da pyrchah ko hajrong ka yurim wa ini i pynheh yei thaw tih moochuni ym dam de i wow ktah chooh chooh ya ka Wah Lunar deilang ka Wah Lukha, neibhah waroh i tngit i jakhlia wa mih na ini i tih moochuni daw tooid ki cha kini ki wah.
Kamwa man kattæ hi kitai ki wah toh wym man de wow dih ya ka um na ki neidaw wa joor jakhlia ki wei ka seiñ hawa yoh wow yieñ yow klam ha kani ka Public Hearing lyngba u President, u K. Suchiang da ong u wa i maa da yang chwa ko ya ka pateiñ wow wan neibhah i dooh noh ya ki um ki wah, i ku i chit da yoo pyn na katni najrong ki tdem ki pum pum hadooh wym sñiaw de tang ya iwa jooh kieh ki sim ki doh.
Ka seiñ da pynsñiaw ko yei diaw mynsien wa mynnu u sñiawthooh wei wow khyrngiat ki bru neibhah dang em bait kiwa ong ini toh i kyrkhu tangwa ym pyrkhat ki wa ini i rhah spah da man ko i tim ha kawi ka sngi.
Da ong leh wa hawa pait chei roi i paar ym em iyi iyi leh wa da wanrah da kini ki karkhana.
Ha ki sngi wa nachwa, neiliang ka seiñ dadep ko wow phah dei thoh cha u Member Secretary ka MSPCB yow pyrchah yeini i pynman ya kani ka thaw tih moochuni.
Discussion about this post