Shillong: Katkam ka tyllong khubor wa da yoh lum, da yoh yutip wa i bhah kaam wa thymme ha ka sorkar Meghalaya Democratic Alliance (MDA) da ye ko wow man haka 1 tarik uni Naichiphaw heiwa ki 2 ngut ki MLA daw chim ki yei smai kam ki Montri wa thymme ha ka sorkar.
Katkam ka khubor wa da yoh da ong wa ki Montri kiwa da yoh u psiah ha ka sorkar wa yahkhmat da ka NPP ha ka jylla toh u Dasakhiat Lamare u yong ka NPP uwa man leh u MLA ka Mawhati uwa daw kylliang heithaw u Comingone Ymbon uwa man u MLA ka NPP na Raliang uwa ksoh katni kam u Montri ka chnat Fisheries wa PWD (Building). Katwa uwi won u Montri wow psiah thymme ha ka sorkar toh u Renikton L Tongkhar uwa man u MLA ka Mawkywat na ka HSPDP u wow kylliang ya u Samlin Malngiang uwa man u MLA ka HSPDP na Sohiong wei uwa ksoh katni kam u Montri ka chnat PHE.
Katkam ka tyllong khubor da pyntip wa da jied ya u Dasakhiat uwa man u khon yong u MLA warim na Umroi toh neidaw wa ka Ri Bhoi District ym em ko ya u MLA wa man Montri ha ka sorkar. Katwa i pynpsiah ya u Renikton toh katkam i tyrwa yong ka HSPDP.
