Ka sorkar jylla dadep pynkhreh ko ya ka ‘Roster’ namo i batai bniah hajrong i bhah kreh hapyrdi ki jaitbru waphær waphær neibynta wow phah cha ka Kasari ka jylla, ka Meghalaya High Court, neibhah yeini i kaam daw chong bichaar mynstep ka 11 tarik.
U Montri Rangbah ka jylla, u Conrad K Sangma da ong u wa ka Dhab ki Montri ka sorkar jylla namo ka Cabinet da pdiang ko ya kani ka ‘Roster’ wa dadep pynkhreh, heiwa da ong u wa iwa emkaam toh ya ka sorkar wow phah ko ya ka cha ka Kasari neibynta wow ye ki kaam u lai chaphrang kiwa da hap sangeh.
Chooh chooh u Conrad da ong u wa ini i kaam toh iwa eh wei iwa kyllaiñ bha tangwa ka sorkar da ye ko wow pynkhreh ya ka ‘Roster’ wow phah cha Kasari wow chong bichaar ha ka sngi wow wan wei da ong u leh wa i pynkrehkaam ya ka Roster daw pynyoo i wa ya ka Reservation Policy da pynkrehkaam pura ha ka jylla katkam wa toh u leh.
Kam wow kdaw heini ka High Court ka Meghalaya ha ka 5 Naitung da pynmih ko ya ka hukum wa ka sorkar jylla emkaam u pynsangeh chwa ko ya i thung kreh hapoh ki chnat sorkar kat hadooh wa da pynbna deiwa tawon neibhah wympu em ki ya ka Roster wei ym pynyoo che katwon tylli ki kreh wa da mang neibynta ki jaitbru waphær waphær katkam ka Reservation Policy.
