Hadien wa mih ka Wyrta hajrong i dooh thiah dooh dem ki bru wa yang ya ka pali yong ki wow chondur Aadhaar ha Jowai khamtam haphrang ka Jowai Post Office ynne ka sngi, neiliang u DC ka West Jaiñtia Hills, u Garod LSN Dykes da pyntip u wa ka sorkar da pynbiang ko ya ki thaw chondur Aadhaar ha ka yung krehkaam u DC wa kamjooh leh ki yung krehkaam ki BDO kiwa em hapoh ka District.
Da pyntip u leh wa da em ki thaw chondur kiwa da booh ha yung krehkaam ka SBI, Jowai Branch kamjooh leh ha ka Post Office ka Jowai ya kiwa da chimkti da ki bru samen.
Hajrong i wan chondur ki bru na East Jaiñtia Hills, da ong u wa emkaam wa ki bru u chondur ki ha jar jiar ki District, neibhah wa da booh ya i thaw chondur ha ki Block yong ki dahi.
Heiyatoh won wa i haap yang ki bru da ki sngi haphrang ka yung krehkaam ka Post Office, Jowai, neiliang u Garod da pyntip u leh wa neiliang kani ka kaam man ko kawa sñiawkhia wei daw chong pyrkhat u yeini mynstep ka sngi wa ki bru kiwa leh yeini i kaam ha kini ki ar thaw.