Mynstep u lai paidbah ki khynnah ka Kiang Nangbah Kolej cha DC

Jowai : Ki khynnah puræ ka Kiang Nangbah Government College, Jowai hapoh i yalam ka KNGCSU ynne ka sngi da khang tylla ki ya ka thaw psiah chapoh ka kolej kam ka dak wow pyrchah yei mynthi ka sorkar yei emkaam kani ka thaw puræ.

Kam wow pynkynmoo heini kini ki khynnah puræ da booh ki 5 tylli ki mat haphrang ka sorkar kiwa kynthup yei thung nongsikai neibhah katkam wa man katni duna nongsikai kani ka kolej ha pyn le tylli ki department khamtam ha ka morning section, wow pynku ya ki kamra næ ki class, wow wai noh ya ka girls hostel, wow su noh ya ka tulop ki nongkreh ki wym pu yoh tulop kattu la 11 bnai, wei wow chna pynmiat noh ya u sarok wow psiah cha kani ka thaw puræ.

Ynne ka sngi ki khynnah puræ da chong ki ha lait kam ka dak pyrchah hadien wa da khang tylla ya ka kolej wei du hadien kattu katni por da wan poi ki pulit wa ki bor distrik wow ap wow sñiaw ya kini ki khynnah. Hadien i ya ñia wa chongchit ki nongyalam wa ki khynnah ym bien ki u wai ya kani ka thaw psiah.

Hei yaklam wa kini ki nongyalam da ong ki wa da chah iehbieñ ware kani ka thaw puræ wei pynkynmoo ki leh wa u Montri wa pait yei puræ puthi u Dr.RC Laloo da kular u wow e bos cha kani ka kolej tangwa hadooh ynne ka sngi leh ym pu yoh ya kitæ ki bos.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Hei yaklam wa ki nong e khubor kini ki nongyalam da pyntip ki wa mynstep 10 waje i step daw lai paidbah ki cha ophis u DC kam ka dak wow pyrchah ya ka sorkar wei wow yoh noh na ka sorkar ya kini ki mat dawa.

“I chah pynbiej heh i ha ka sorkar, kamtæ u pynman noh i da ka indefinite strike, weiwa hadien wa yoo ya ki kot ki sla hei yatoh wa kini ki mat yoosar dang slem bha u yoh i ki” da ong uwi na ki nongyalam u khynroo Jersom Shylla.

Chooh chooh ki khynnah puræ da ong ki wa la dym ye ka sorkar u e yei emkaam kani ka thaw puræ tæ da dawa ki wow hiar chuki noh u Dr. RC Laloo.

Kini ki nongyalam da kyntu ki leh ya ki paidbah wa ki seiñbhalang wow kyrchan ya ki mynstep ha ini i lai paidbah yong ki neibynta i bha i miat ka jaidbru wa ka mynried ka Ri Loom Jaiñtia.

Hadien wada liwan ki khynnah na kani ka kolej ki bor distrik kiwa kynthup ya u ADM u ma SC Laloo wa ki bor pulit da tympiah ki ya u tylla wa da khang ki khynnah ha ka thaw psiah cha kani ka thaw puræ.

Nei liang ki bor pulit ka Jowai Police Station da pyntip ki wa da man ki kiwa pynkhreh ki wow khanglad ya kini ki khynnah u lai paidbah.