June 15, 2018

Mynstep u pteiñ biang ka lympung Meghalaya Baby League

Shillong: I wan chimbynta hadooh 12 tylli ki dhab hawa sdang ya ka Meghalaya Baby League (MBL) ka wow pteiñ biang mynstep ha madan Polo Ground man ko kawa kyrpang bha.

Ka MBL kawa da wai ha uni u bnai wa dadep daw pynyaleh ya ka man ka Sngi Choh-that ha kini ki bnai wow wan heiwa daw em hadooh 30 tylli ki yakhun waroh ha ki le tylli ki madan wa kynthup ya ka Third Ground, ka Jawaharlal Nehru Stadium wa ka Futsal Ground waroh kini kiwa em ha Jawaharlal Nehru Sports Complex.

Advertisement ad1

Ka yakhun wa nyngkong mynstep u man ko hapyrdi ka Kickstart FCC Rhinos pyrchah ya ka Langsning Greenergy Lions, heipor 9:00 waje i step ha ka Third Ground neiliang ka Western Conference.

Waroh san tylli ki kyrdan (five age group) yong ka Kickstart Rhinos wa Langsning Greenergy Lions u yakhun ki pyrchah iwi ya iwi wei daw pynbood ya i jooh i rukom neibynta kiwi tawon ki dhab.

Daw em won leh ka yakhun hapyrdi ka Mawlatbah SC Hawks pyrchah ya ka ENE Falcons nadooh 12:00 waje i sngi, i wow pynbood won ya ka Unified Gorkha Gators pyrchah ya ka Little Star Clouded Leopards nadooh 1:10 waje i sngi. Waroh kini ki dhab toh neiliang ka Western Conference.

Na ka Eastern Conference, ka Sunnydale School Doves pyrchah ya ka Touchline NE Cubs heipor 9:30 i step ha Jawaharlal Nehru Stadium, i wow pynbood won sa ka Nongthymmai GC Scorpions pyrchah ya ka Nongtrai Cheetahs heipor 2:15 nohchariñ ka sngi neitæ won ka Wahlakhiat Bulls pyrchah ya ka JNS Jaguars heipor 3:00 waje nohchariñ ka sngi.

Da pdiang ya waroh wow wan sakhi ki ya kini ki yakhun.

Ka Baby League toh kawa da sdang pynman dei yakrehlang ki seiñ kreh mon sñiawbha kam ka Tata Trusts ka MFA wa ka AIFF hajrong ka thong wow elaad ya ki khynnah kiwa hapyrdi 4 hadooh 13 snem wow embynta ki ha ka yalehke football ha ki ynru bnai ki wow wan.

Ka lympung u man ko kam ka League-cum-Knockout, heiwa ka yaleh ko mar san ngut chiliang wa ynñiaw ngut chiliang wei ini chong i ha ki kyrdan yalehke wa da yabhah.

Neibynta ka kyrdan 4-5 snem wa 5-6 snem ka yaleh u man ko san ngut chiliang wei emkaam wow em 10 ngut ha kawi ka dhab. Ha ka kyrdan 8-9 snem, 10-11 snem wa 12-13 snem yalehke u mar ynñiaw ngut chiliang heiwa ki dhab u em ki 12 ngut kiwa yalehke ha kawi pa kawi ka dhab.