Shillong: Ka 43-Williamnagar Constituency mynstep ka sngi daw rai ko ya u næ ka wow mihkhmat cha ka yung dorbar chna aiñ ka jylla hadien wa pynsangeh noh ya ka hadien wa chah tynyap u kyrtong ka Nationalist Congress Party (NCP), u Jonathone N Sangma ha ka 18 Thohlakhmi uni u snem.
Ka yakhun ya ka Election ha Williamnagar toh hapyrdi ki 9 ngut ki kyrtong wa kynthup ya ka kyrtong NCP kawa man leh ka kurim u Jonathone N. Sangma, ka Krinilla R Marak, u Marcuise N Marak (NPP), Deborah C. Marak (INC), Mahamsing M. Sangma (UDP), Sengbath R Marak (Independent), Lahatson N Marak (Independent), Santosh R. Marak (BJP), Siljong R. Marak (Independent) wa u Jan N. Arengh (Independent).
Hawa yaklam wa u Chief Electoral Officer (CEO) ka jylla, u Federick R Kharkongor da ong u wa i pynkhreh ya ka Election ha Williamnagar da man ko kawa lai bait wei i thap vote mynstep ka sngi u sdang i nadooh 7:00 waje i step hadooh 4:00 waje i janmiet we ii ñiaw vote leh u man i ha ka 01 tarik Naisan.
Da ong u wa ka tnat Election da pynjoor ko ya ka kaam wow sonteri ya ki kyrtong wow yakhun ya ka election we da phah leh 4 Company ki pulit Central Police Force (CPF) wow sonteri ya ka Constituency khnang wa ka Election u man ko kawa lai bait.
U CEO da pyntip u leh wa em 58 tylli ki Polling Station ha kani ka constituency, 25 tylli toh kiwa em ha nongkyndong katwa kiwi won toh kiwa haap ha ki thaw sor, da em kamwa 100 tylli ki EVM chirup wa kiwa pynyang boi em kiwon kiwon kiwa thut.
U Kharkongor da ong u wa kani ka Election da pynemkaam 10 tylli ki Web Casting kiwa ye u pait na Shillong.
Da ong u leh wa ka thap Vote mynstep u man ko kawa lai bait khlem iwon iwon i jia lait na i pynthup i bor ka rymaw.
Discussion about this post