Ka dhab ki Montri (Cabinet) yong ka sorkar Meghalaya da mynjur ki ya ka bui (Report) wa da e yumut yong ki le tylli ki Regional Committee wow pynbait ya u pood u ang wa ka jylla Assam, wei ya kani ka Report ka sorkar Meghalaya wa ka sorkar Assam daw phah noh ki cha ka Ministry of Home Affairs (MHA) yong ka sorkar India.
U Montri Rangbah ka jylla, u Conrad Kongal Sangma da pyntip u wa oo wa u Montri Rangbah ka Assam daw lai ki wow yachem mynstep ka sngi ya u Montri Kaam Pohyung ka ri, u Amit Shah, wei hadien i yaklam bniah ha Delhi, ka MHA ka sorkar India daw e ko ya ka rai wa khaddooh.
Hawa kylli, u Conrad da kyntait u wow ong iyi iyi iwa em hapoh ka Report ka Regional Committee, tangwa da ong u wa daw pyntip hadien wa da dep yaklam wa ka MHA.
Chooh chooh u Montri Rangbah ka Meghalaya da kyntait u wa i ya pynbait ya u pood u ang u man ko deiwa ya e kylliang ya ki thaw, tangwa da pyntip u wa i pynbait ya u pood u ang toh deiwa ap yeiwa sñiaw ki paidbah wa kiwa ya embynta wei khlem da pynbor ya kiwa chong chnong ha khappood.
U Conrad da ong u leh wa waroh ar tylli ki sorkar da mynjur ki ya ka Report yong ki Regional Committee wei ya ka Report daw lai rah cha ka MHA toh kawa ya sariem na waroh ar jylla.
Hawa kylli chooh chooh u Montri Rangbah da ong u wa ka sorkar India daw hap ko wow lai katkam ki kyndon aiñ kiwa em, khamtam hawa yatoh wa i liar dak ya u pood u ang neibhah wa toh i kaam wa hap rah hapoh Parliament wei hap wow wanrah leh ya ka Bill wei ye leh wow em sa i lai pait leh na ka chnat Survey of India.
Katkam wa pyntip u Conrad da em 36 tylli ki chnong kiwa haap hapoh ki 6 tylli ki thaw wa da booh yow pynbait nyngkong ya u pood u ang wei i heh yong ka thaw toh 36.79 Sq km.
