Ka Regional Democratic Alliance (RDA), kawa man ka kynhun wa ya krehlang yong ki ar tylli ki seiñ saiñpyrthai, kitæ ka United Democratic Party (UDP) wa ka Hill State People’s Democratic Party (HSPDP), ynne ka 19 tarik daw sdang ko wow lai yalap ya ka Election chiteiñ samoi ha Mawphlang wa Rajabala.
Hawa klam hadien ka yalang ka RDA, u Renikton L Tongkhar uwa man u Secretary da ong wa i thong yong ka RDA toh wow wanrah yei yatylli yong waroh ki seiñ ri-loom ha ka jylla, wei da pyntip leh wa kiwa yahkhmat warim leh ki da pyrchang ki katwa ye yow pynyatylli ya ki seiñ saiñpyrthai tre ri.
Da ong u leh wa i yatylli da yaklam boonsien leh ha i por yong u Dr. Donkupar Roy (uwa da khlaad noh), deiwa pynrap wa i chna ya ka RDA da ka UDP wa ka HSPDP man ko kawi na ki luti wow ya krehlang ki seiñ saiñpyrthai ri-loom.
Hawa yatoh wa ka Election chiteiñ samoi, u Tongkhar da ong u wa hapoh ka RDA, ka HSPDP daw kyrchaan ko ya u kyrtong ka UDP ha Mawphlang, u Eugeneson Lyngdoh, heiwa da ong leh wa da mynjur wei kyrchaan bait ya u kyrtong ka UDP, u Ashahel D. Shira ha Rajabala.
Hawa yatoh wa ka Mawryngkneng, u Tongkhar da ong u wa ka RDA ka khlem chim rai iyi iyi neibhah ka UDP ym em sai kyrtong ko, tangwa da pynsñiaw u yei kyrmen wa u kyrtong ka National People’s Party (NPP) wa yahkhmat ya ka sorkar Meghalaya Democratic Alliance (MDA) daw jop u na Mawryngkneng.
