Jowai: Ka Congress ynne ka sngi da sdang ko ya ka yalap Election MDC deiwa pynman ya ka yalang paidbah ha Barato neibynta u Aiborlang Shadap uwa man kam u kyrtong ka Party na 12-Barato Mukroh ADC Constituency uwa jooh man leh kam u waheh chnong ka Barato, West Jaiñtia Hills District uwa da kyrpaad ya ki paidbah ka thaaiñ wow e i kyrchaan wa pura ya oo ha kani ka kynti.
U Aiborlang da ong u wa i daw wa rai u wow yakhun toh wow e i chakri ya ki paidbah ka thaaiñ wei wow wanrah ya ki kaam pynroi wa ha rukom.
U Aiborlang da ong u wa kam uwa chong chnong ka thaaiñ wei kam uwa jooh kreh ya ki kaam chnong da ki boon snem da yoo u wa duna ki kaam pynroi kamtæ ini da pynbor i ya oo wow yakhun ya ka Election MDC.
“Lada poi ha ka thong kwah O wow yakrehlang chirup wa kiwi kiwa mihkhnat khnang wow ye u wanrah yei chongsuk khamtam hapoh ki thaaiñ khappood neibhah wa boonsien mih i awri hapyrdi ki jaitbru ka jylla Assam wa ki Khasi Pnar,” da pynrap u Aiborlang.
Hajrong i artatien ki paidbah wow kyrchaan ya ka Congress, da ong u wa kiwa chong chnong hi kiwa da chemphang ha ka kaam saiñ hima sima kyruiñ ki cha ka Congress neibhah wa sñiawthooh ki wa su ka hi wa ye u chakri khlem pait chiliang khmat.
Neiliang u James Lyngdoh uwa man kam u Working President ka Meghalaya Pradesh Congress Committee (MPCC) da pynche u hajrong ki yurim ka Congress kawa em ka thong wow pynwiar yei dooh i duk wei wow wanrah ya ki kaam pynroi cha ki paidbah.
Hawa kyruiñ cha ka kaam saiñ hima da ong u wa du ka Congress wa ye wow yakhun pyrchah ya ka BJP, katwa ki seiñ ri-loom heh ki du i ktien wei ki wot wa emkti ha ka kaam synchaar wa ka BJP.
Kiwi wa da klam ha kani ka sngi kynthup ki ya u Nehemayah Tyngkan uwa man kam u Finance Secretary ka District Congress Committee, u Winning G Sungoh MDC ka 14-Mowkaiaw, u Rikut Pareiñ u kyrtong na ka 13- Saphai Constituency, u Willy Suchiang wa man kam u Secretary MPCC wei ya ka yalang da pynlai da u waheh dong ka Barato u K. Shadap.
Discussion about this post