Ka JSU seiñbei waka Khliehriat Circle ha ryngkat kiwa yahkhmat ka chnong Thangskai da yachem ki ya ka Montri ka chnat i chait i khiah, ka Ampareen Lyngdoh ha Secretariat heiwa da booh ya ka ujor ha ka sorkar hajrong i thap pyrtuid ya u Ayush Kumar ha ka thup puræ MBBS wei neiliang ka Montri da ong ko wa ka sorkar pdiang ko ya ki kot ki sla wa da phah na yung krehkaam u DC wei da chem wa u Ayush Kumar da pynemkaam u da ka PRC kawa yoh na u DC ha u snem 2021 wei da ong ko wa emkaam wow paan pynche na u DC ka East Jaiñtia hajrong ka PRC uni u baar jylla.
Neiliang ka seiñ da dawa ko na ka sorkar wa ymtoh u e laad ya u Ayush Kumar wow lai puræ MBBS neibhah ymtoh uwa chong chnong wa pura ka chnong Thangskai.
Da pynche leh ha ka Montri wa u Ayush deilang wa u pa u ymtoh kiwa chong chnong wa pura ka chnong Thangskai heiwa ki da em ki du da ka Temporary Residential Certificate kawa da e cha ki tangwa ym em da ong won wa da kani ye ki wow lai yaleh PRC hadooh wow yoh yei bhah lai puræ MBBS naka State Quota ka Meghalaya.
Chooh chooh ka seiñ chirup wa ki heh ka Thangskai daw lai yachem ki ya u DC wow tih bniah hajrong ini waroh wei wow pyndooh ya u Ayush Kumar wow lai puræ MBBS u.
Ka seiñ da kyntu ko leh ya waroh wa ymtoh wow e ya ka Residential Certificate wa pura ya ki baar jylla khnang wow lait ki u chim kabu kamni.
Discussion about this post