Ka sorkar Meghalaya da booh thong ko wow yoh kiwa yalehke napoh ka jylla kiwa daw yoh u chimbynta ha ka Olympic Games kat ha u 2032 wei da kreh chitom ko yow ye u leh yeini, da ong u Montri Rangbah ka jylla, u Conrad Sangma kam chibynta i pynkhreh yow pynman ya ka 2nd North East Olympic Games 2022 hapoh Meghalaya ha uni u bnai.
“Kani toh ka lympung wa heh dooh hapoh ka jylla wei man ko leh kawa yahaap bha kam chibynta wow lehkmen yei dap 50 snem ka jylla,” da ong u Conrad hawa phah ya ka khubor pdiang sñiawbha cha palat 2000 ngut kiwa yalehke kiwa daw poi cha Shillong ha kini ki sngi wow wan.
U Conrad da ong u leh wa kani ka North East Games toh kawa chibynta wow chem ya kiwa yalehke wa em yei sap heijooh i por yow pynchlur ya ki ku wow poi ki cha ki kyrdaan wa heh chooh chooh deiwa e leh da ka poisa kawa da ki phaw hajar ha ki kyrdan hapoh ka jylla ya kiwa yoh takma ksiar wei hadooh T. 75 lak neibynta ka Olympics.
“Ha kini ki soo snem chiteiñ, ka sorkar Meghalaya da leh ko chiboon ki kaam yow pynkylla yei rukom kreh heiyatoh wa ki Sports deiwa thooh chwa ya kiwa em yei sap kamjooh deiwa tipmit ya kitu kiwa da dep wanrah burom, i pynku ya ka mang poisa yow chna ya ki thaw yalehke, i e yarap poisa ya ki Sports Associations yow pynman Tournament wei wow phah ya kiwa yalehke cha baar yow chimbynta ha ki yakob kamjooh i chem ya kiwa em yei sap,” da ong u.
Da ong u leh wa hanla ini dang man i yimphoo wow yoh u embynta ha ka Olympics ha u 2032 tangwa deiwa ya krehlang waroh kiwa em ya ini i jooh i angnood daw ye wow mankaam wei ka sorkar da em ko yow pynbiang ya iwa emkaam kiwa yalehke yow poi cha kani ka thong.
Heiyatoh wow pynkhreh u pynman ya kani ka 2nd North East Olympic Games 2022 kawa daw sdang nadooh ka 10 tarik, daw pynman 18 tylli ki jait yalehke.
Ynnin ka sngi, neiliang u NEOG 2022 Co-Chairman wa Commissioner & Secretary ka sorkar Meghalaya, u Dr. Vijay Kumar D IAS, da lai pait u ya ki thaw pynman ya ki yalehke ha Greater Shillong deiwa emlang u Secretary ka sorkar, u Cyril VD Diengdoh IAS, u Director of Sports and Youth Affairs, u Shivansh Awasthi IAS wa kiwi de ki sahep.
Da em ki thaw yalehke kiwa da hap pynchna rap boon kam ka madan ka MFA ha madan Polo kawa da pyndait wa ki Floodlight wa da wanrah na madan ka SAI.
Da thung leh da ki spah ngut ki Volunteer da ka chnat Sports and Youth Affairs yow pynman ya kani ka yalehke kawa jop heiwa i leh Registration, i pynbiang thaw sah, ki kari, ki baam toh kiwa da lai chaait chaait khlem sangeh.
