Ka khlam COVID-19 katkam wa man hadooh ynne ka sngi ha ka ri da man ko kawa da sdang hiar kiwa chah ktah tangwa hapoh ka thaaiñ mihsngi ka ri wei khamtam hapoh ka jylla Meghalaya da man ko kawa da joor i poor katwa dang mih ki sngi wei ini da wanrah i leh yei dooh ya kiwa boon ki mynsien wa kordor. Kini kiyi kiyi waroh da pynbor i ya ka sorkar wow kyruiñ cha ki bor chnong wa ki seiñ wow yarap yakhun ya kani ka khlam COVID-19.
Ha kini ki sngi da mih ki seiñbhalang wa ki bru samen wa wan e yarap cha ki paidbah khamtam kiwa chah ktah ha kani ka khlam.
Ha kani ka kynti da yoh ya ka yutip wa u MDC ka Jowai Central, u Awhai Andrew Shullai da sdang u wow e yarap da ki sula yada PPE cha ki kattu katni tylli ki manyung ha Jowai heipor wa pyndep ya ka lehniam wa khaddooh neibynta kiwa khlaad na ka khlam COVID-19.
Chooh chooh da chem wa u MDC da thoh u cha ki heh ka Synjuk ki Waheh Chnong, Jowai heiwa da tyrwa yarap u da ki PPE cha ki manyung wa chah ktah ha kani ka khlam khamtam heipor wa pyndep ya ka niam wa khaddooh ya kiwa khlaad na kani ka kjut.
Neiliang u Wyrta da yaklam u wa u Andrew heiyatoh wa ini wei da kubur u wa da thoh u cha ki waheh chnong khnang wow ye ki manyung u yoh PPE heipor wa biang wow pyndep ya ka niam wa khaddooh ya kiwa khlaad na u COVID-19, heiwa da ong u wa kini ki PPE ym mut ki du wow pynemkaam ki Tymmen Thang-bru, ki Pastor tangwa mut ki leh neibynta kiwa hayung hasem heipor wa yarap kit ki ya kiwa chah ktah cha ki thaw sumaar.
Heiyatoh wa lada i e yarap yong oo toh du neibynta ki paidbah ka Jowai Central Constituency, neiliang u Andrew da pynche u wa ini i e yarap toh neibynta ka Jowai wa ka Ri-loom Jaiñtia hi waroh kawi tangwa ki paidbah emkaam won wow wan thooh ki ya kini ki PPE na i thaw wa da booh ya ki neibhah wa man i iwa eh wow lai booh ya ki ha man la ki thaw wa emkaam.
U Andrew da pyntip che u leh wa ini i e yarap yong oo ymtoh wan i na kawon kawon ka Scheme tangwa yeini da leh u dei bor samen yong oo deiwa pynlut na kata khnang wow man ki kaam kiwa lai bait neibhah ki PPE man ki kiwa sy’ad dor wei man i iwa eh ya ki manyung wow thied ya ki hawa emkaam.
Chooh chooh da pyntip u wa ya kini ki PPE ye leh wow wan chim da kiwa kreh ha ka chnat i chait i khiah lada dawa i kaam ya ki.
Khaddooh, neiliang u MDC da kyntu u ya ki paidbah wow man ki kiwa syndong wei kiwa husiar deiwa bood ya ki kyndon wa ka sorkar da booh ko neipor cheipor khamtam heiyatoh wa kani ka khlam COVID-19.
I Number wa ye u Phone hawa emkaam ya ki PPE wa e yarap u MDC heiwon iwon i por neibynta ki manyung wow pyndep ya ka niam wa khaddooh toh-9856407505.
