U Montri Rangbah ka jylla, u Conrad K Sangma da ong u wa em hadooh 21 tylli ki karkhana Coke Factory ha ka thaaiñ Shallang, West Khasi Hills District, wei na kini du 4 tylli kiwa biang ya ki kot ki sla, katwa 17 tylli toh kiwa pynkrehkaam pyrchah ya ka aiñ.
Hawa jubab yeiwa kylli wa da wanrah da u MLA ka Congress na Mawsynram, u Himalaya Shangpliang, u Montri Rangbah da pyntip u wa ka sorkar lyngba ka Meghalaya State Pollution Control Board ha ka 15 tarik u Naisaphra, 2020 da phah ko dei thoh yow hukum ya ki 17 tylli ki karkhana pynmih Coke wa pyrchah yaka aiñ wa toh u khang noh ki neidaw wym em yoh bor ki.
Da pyntip u wa napyrdi ki 17 tylli kiwa krehkaam pyrchah yaka aiñ, 7 tylli toh ki wym biang ya ki kot ki sla, katwa 10 tylli toh kiwa yoh bor du lyngba ka Single Window Agency tangwa ym em yoh bor won na ka MSPCB heiwa ya kini leh hap wow kheiñ wa man ki kiwa pyrchah aiñ.
Hawa jubab yeiwa kylli pynrap wa kini ki karkhana ym pu em khang ya ki wot hadien wa da pynmih hukum, neiliang u Conrad da pyntip u wa ki karkhana Coke wa pyrchah aiñ da khang lut katkam ka Report wa ka sorkar da yoh ko na ki bor pynlai District, deiwa pynrap leh wa ka sorkar ym ye ko wow tympra yabor ya kitai ki karkhana neibhah em na kini kiwa lai rah ya ini i kaam cha Kachari wei da em leh ka aiñ katkam ka Air Act wa Water Act yow pynchitom ya kiwa pyrchah aiñ.
Hawa jubab chooh chooh yei pynpoi mooyong cha kitai ki karkhana, u Montri Rangbah da pyntip u wa ya mooyong da wanrah na Assam wa West Bengal wa kattu katni na u mooyong wa da yoh bor wow lilam na ka jylla Meghalaya.
