Shillong: Ynnin ka sngi ki pulit ka Anti Narcotic Task Force (ANTF), East Khasi Hills da kem ki ya ki le ngut kiwa Madanrting Block D & F, Shillong .
Ya kini ki le ngut da tip kam u Lalpengsouli (53 snem) na Madanriting Block-D wei na oo da yoh 61.6 gram i Heroin wa song ha ki san tylli ki synduk sabon, wa ka poisa T. 1, 41, 260, ki ar ngut won wa yoh kem na Block F da tip kam ka Rebecca Hmar (35 snem) wa u kurim ko u Vanlalmawia Hmar (28 snem) wei na ki da yoh 36. 31 gram i heroin wa paka (High Grade) wa T. 34, 760.
Hawa yaklam wa kiwa pathai khubor, u SP City u S Rynjah da ong wa ya kini da kem hadien wa yoh yutip wa tikna ynnin i miet heipor 7:00 waje wei hadien wa kem ya ki da yah ya ki hakhmat ka yung bichaar.
Da pyntip u leh wa da katni da sdang wow song ya i drug ha ki synduk sabon wei iwi i synduk chongdor i T. 35, 000 wei ynnin da yoh hadooh 8 synduk iwa chongdor wa T. 2.5 lak.
Da pyntip u leh wa ini man i i yoh kem wa heh dooh ha Shillong wei iwa yoh na kini ki le ngut i drugs da man i 98 gram wei i dor yaaw (International Market) man i T. 8.9 lak.
Ya kini da pynngat hapoh ka Section 21 (b) wa 29 yong ka Narcotic Drugs and Psychotropic Substances (NDPS) Act.
“Ini man I i kaam wa jop ya ki pulit ka East Khasi Hills wa ki ANTF neibhah da kreh chitom wow yoh ya kini ki bru wei hadien wa takit ya ki da chem wa wan ini i drug na baar jylla,” da ong u Rynjah wei da pynrap u wa boonsien da wanrah yei drug na Manipur, Mizoram wa na ri Myanmar.
Heijooh i por da pyntip u wa ha uni u snem (2018) da yoh hadooh 1.5 Kilo wa 20,000 tylli ki drug Methamphetamine wei da em 49 tylli ki mukotduma (Case) hapoh ka NDPS Act.
Discussion about this post