Kawa yahkhmat ka United Democratic Party (UDP), ka Banalari Khongwar kawa da jooh yakhun ya ka Election na Pynursla pyrchah ya u Prestone Tynsong ha u snem 2008 wa 2013 da lai psiah noh ko cha ka National People’s Party (NPP) ynne ka sngi.
Ini i lai psiah ka Banalari da pynkhlan chooh chooh i ya ka NPP khamtam ha Pynursla Constituency. Ya ka Banalari ryngkat wa kiwa synraan da pdiang sñiawbha cha ka NPP da u National Vice President ka Party, u Prestone Tynsong, heiwa da emlang leh ka President yong ka Women’s Wing wa kiwa kitkaam ka Party na East Khasi Hills District ha ka yalang wa pynlai da u Working President ka NPP State Unit, u Dr. Donkupar War.
Hawa klam ha kani ka yalang wa tbian, ka Banalari da ong ko wa ha u snem 2022 da mih noh ko na ka UDP na ki daw samen, wei i daw wa lai ko cha ka NPP toh hadien wa da yoo ki ya ki kaam wa u Prestone Tynsong kam u MLA da kreh u ha ka thaaiñ waroh kawi.
Neiliang ka NPP State Unit ha kani ka sngi da pynbna ko wa da e kti ya ka Banalari da i kaam kam ka Vice President yong ka Women’s Wing wow kreh neibynta ka Party ym du ha Pynursla, tangwa ha ka jylla waroh kawi.
U Prestone hawa klam ha kani ka yalang da pdiang sñiawbha u ya waroh kiwa da psiah cha ka Party khamtam ka Banalari kawa da krehchitom ko ha Pynursla Constituency.
