Na Mawlai sdang ka yalap Election ka UDP wa HSPDP wow kyrchaan ya u Syiemlieh

Shillong: Ki artylli ki seiñ saiñhima ri-loom ka jylla, ka UDP waka HSPDP kiwa da yatoh lok chwa wow pynman ya ka Election da sdang ki ya ka yalap Election da ka yalang wa pynman ha Mawlai Constituency ynnin ka 8 tarik.

Ka yalap Election toh neibynta u MLA ka UDP wa katni u Embhahlang Syiemlieh ya kawa da pynman ha Polytechnic Ground, Kynton Massar heiwa ki heh ka UDP waka HSPDP leh emlang ki wa kynthup ya u heh ka HSPDP u Ardent Miller Basaiawmoit, U Paul Lyngdoh UDP Working President wa u General Secretary u Jemino Mawthoh.

U Paul Lyngdoh da klam u chaphang ki 22 snem nachwa heipor wa dang man ki kam kiwa yahkhmat ya ki seiñbhalang wei ki tip bha ki yei eh i khoo wa ki paidbah chem ki.

Da ong u wa ka Congress da synchaar ko la 35 snem wei ym ye ko u pynyoh yeiwa angnood ki paidbah.

Related posts

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

“U pyntikna i wa ka Congress khamtam kawa yahkhmat u Dr. Mukul Sangma ym poi de ko hei bor,” da ong u Paul.

Da ong u leh wa katni ka Congress da pra ko heiwa da em ki MLA kiwa daw lai patok katwa kiwi won da psiah ki cha kiwi ki Party.

Kamtæ da kyntu u ya ki paidbah wow e ki ya i kyrchaan ya u Syiemlieh u MLA wa katni ka Mawlai neibhah da tikna wa UDP waka HSPDP daw poi ki hei bor synchaar.

U heh ka HSPDP u MLA ka Nongkrem, u Ardent Miller Basaiawmoit da pynkynmoo u ya ki paidbah wa ym hoi u chah pynbiej ki ha ka poisa heipor Election.

Da pynyasriem u ya i jied ya u kyrtong wow kyrchaan da sariem ko kam iwa jied kurim wei lada bakla da man ko chi rta i silet i chitom.

Da ong u leh wa emkaam u em i sñiawthooh yumut hapyrdi ki party ri-loom yow ye u pynwiar noh ya ka Congress.

“Hapoh ka sorkar Congress wa katni waroh ki kaam Contract da leh pyn da ki MLA hi iwa pyndooh kreh ya ki Contract,” pynbaad u Basaiawmoit.

“Lada poi ka sorkar i ha i bor daw pynimbiang i ki yaaw ki hat ki kahyi peteiñ kiwa da tlot bha katni,” da pteiñ u Basaiawmoit.

U MLA ka UDP na Mawlai, u Syiemlieh won da ong u wa pynlut poisa ka sorkar Congress du ha ki tamasa wa boon wei da klam pyrchah u leh yeiwa ong u MDC ka Mawlai u PT Sawkmie uwa ong wa u MLA toh u wym pu biang u man kam u MLA.

“Nga ym pu em biang man O kam u MLA neibhah nga ym tip O u baamtooh katwa me won da pliah da biang bha mi ha kini ki kaam,” da jubab u Syiemlieh.