Ynne ka sngi u MP ka Shillong uwa man leh u kyrtong MP ka Congress, u Vincent H Pala da pynman u ya ka yalang yalap Election ha Iawmusiang, Jowai heiwa ya ka yalang da pynlai da u Philemon Lyngdoh.
Ha kani ka yalang da emlang u Charles Marngar, MLA ka Congress na Mawhati, ki MDC ka JHADC kam u Richard S Lyngdoh na Nongkhlieh, u Brightstar Chyrmang na Jowai North, ki dkhot ka Party kam u Emlang Laloo, u Rikut Pareiñ wa kiwi kiwi.
U CEM warim ka JHADC, u MB Rymbai hawa e yei klam da ong u wa nadooh wa sdang u wow thap Vote u da em u waka Congress nadooh u 1988 wei da mih u na ka ha u 2018 heiwa da psiah noh u cha ka NPP wei hadien kamwa 18 bnai da mih noh u na ka.
Da ong u leh wa katni da em u pura waka Congress deiwa yaroh u ya u Vincent Pala uwa da ye u kdong waroh ki kdong ki chmiang ka Bri Ynñiawtrep liang wanang.
Kamtæ da kyrpaad u ya kiwa chong chnong ka sor Jowai wow jied ya u Vincent Pala deiwa bichaar bniah iyi yoh myntoi ki na oo kam u MP nadooh ki thaw sumaar kam ka NEIGRIHMS, ka MCH ha Panaliar, ka Iawmusiang Complex wa kiwi kiwi.
U Brightstar Chyrmang hawa e i klam da kyntu u ya ki paidbah wow jied biang ya u Vincent Pala neibhah wa da man u u bru wa da chemphang wei lada jied da kiwa thymme daw thut i rukom krehkaam ki.
Da kyrmen u leh wow wan biang ka Congress u synchaar ya ka ri India heiwa u Vincent da tikna wow yoh u ya i kyrdan kam u Montri ka sorkar India.
Chooh chooh da ong u wa du ka Congress ka seiñ neini kawa ye wow chna sorkar ha Delhi wei kiwi ki Party na ka jylla ym ye ki wow chna ya kani ka sorkar pyrdi.
U Richard S Lyngdoh leh da kyntu u ya ki paidbah wow kyrchaan biang ya u Vincent H Pala na kani ka Constituency deiwa chon ha ka chaap ka kti ha ka 19 tarik.
U Charles Marngar da ong u wa ha Ri-Bhoi hi waroh kawi, u Vincent u poi u hei nyngkong ha kani ka Election heiwa da yaroh u ya u MP wa katni uwa da yasaaid hapoh Parliament heiyatoh waka jaitbru.
Da pynche u hajrong i klam ki bru wa iyi klam u ha Parliament ha ki 15 snem wa da lai, da ong u wa na ki MP na thaaiñ mihsngi (North East) toh du u Vincent uwa klam boonsien dooh hapoh Parliament uwa da klam hajrong ka ILP, wow pynpsiah ya ka ktien Khasi hapoh ka Eight Schedule, u pood, ki khian paaid wa kiwi kiwi.
Da e nongmuna u ya u sarok Shillong-Tura, u Shillong-Guwahati Bypass, u Jowai Bypass, Shillong Dawki wa kiwi ki sarok wa da yoh toh nei kreh chitom u Vincent Pala.
Heiyatoh wa i chah klam beiñ ki bru ha Delhi na North East kiwa da chah ong wa ki bru na kani ka thaaiñ wa toh ki baar ri, heini u Vincent da yieñ u wow klam pyrchah yeini i sñiaw wei chah klam beiñ ki jaitbru na kani ka thaaiñ.
Chooh chooh da ong u wa ka NPP toh ka BJP neibhah neiyi i daw wym em kyrtong ka BJP na Shillong wei neiyi i daw wa phah chon u Conrad Sangma ha i dur ka kot lada kwah ki u jied ya u Narendra Modi.
Da puræ u leh ya i sur rwai wa da thoh u ynne ka sngi heiyatoh wa u Vincent Pala wa kani ka Election MP.
U Charles da ong u wa la 15 snem da man u Vincent kam u MP kam u pa wa pyndap ya ka yung ka sem kamtæ emkaam u pteiñ u kyrchaan biang ya oo ha kani ka kynti.
Ya ki kyntien khublei ynne da e da u heh ka Party na Mowkaiaw, u Rikut Pareiñ.
Discussion about this post