Nadooh i chna mot sahnaam ya ki khlawait ka kur hadooh i yait nei pynklla kur da yaklam ha ka yachemlang ka Kur Iawchibidi  

Ki khon ka Kur Iawchibidi kiwa em u Mootylleiñ Tymmoh hapoh chnong Jowai, ynne ka sngi da pynman ki ya ka yachemlang wa kyrpang ha Yungwalieh ka Loompyrdi Iongpiah.

Ka Matpeiñ yong kani ka yachemlang toh kawa ong “Na u Troop Ksiar Ka Beipun Iawchibidi Daroi Dapar I Hadooh Katni” wei ka thong yong kani ka yachemlang toh yow ya tipmit tipmat wei yow wanrah i sñiaw yajooh yajan hapyrdi ki khon ka kur.

Ha ka yalang yong kani ka sngi da kdar luti da ki kyntien ngoohblai ngoohsyiem da u Raymond Nartiang, Pator Raij Jowai wei da pynbood won i pynhær ya ka lama da ka Men Kongka Laloo, i klam pdiang burom wei e ki kyntien yahkhmat da u Lammat-Oo Laloo, Vice-President Kur Iawchibidi, Jowai kamjooh leh i klam da u Clinton Pohsnem wa man uwi na ki khon ka Kur Iawchbidi na Nongtlang katwa hei pynkut won u Wandauru Laloo, General Secretary Kur Iawchibidi e u ki kyntien sñiawngooh. 

U Lammat-Oo Laloo hei klam da ñiawtang u yei burom yong ki waheh wasian ka kur kiwa da yakit yabah ya ka lyngkor yong ka Seiñ Kur ha ki por ki snem kiwa dalai wei kyrpang chooh leh da kyrsu kyntu u ya ki khon ka kur waroh wow man kiwa tip u ya burom kylliang wei u ri yei burom ka kur ka jait hakhmat ka pyrthai mynder.

U  Rishottre Pyrbot kam uwi na ki khon ka kur na Shillong hei klam da ong u wa man iwa emkaam bha wow em noh i pyrkhat thymme hapoh ka Seiñ Kur ha ka yurim wow ye u pynjanai yei tæ i sñiaw yaman iwi, i yajooh yajan, ya maya saya hapyrdi ki khon ka kur.

Chooh chooh da ong u leh ya ki khon ka kur wow yait nei pynkylla kur ya ki khon u chynrang khnang yow toh u biang ka yakheiñ ratap rabiang kamjooh leh yow lait ka pateiñ khon pateiñ ksu nei wiarnar wiarluti ha ka chongkha chongman.

Related posts

Phooh phieñ wei chongkun ka Lehniam Pastieh wa Chaad Niamtre ka Raij Raliang

February 13, 2026

Daw pynman ya ka General Meeting ka Seiñkur Suchiang

January 31, 2026

Iwa kyrpang chooh leh ha kani ka sngi toh i klam i khanna yei parom ka Seiñjait Iawchibidi da ka Wompher Laloo heiwa i klam i kappæ yong ka da pynchoh sakhiat i yei man i sñiaw ki pateiñ khon pateiñ ksu ka Seinjait Iawchibidi.

Neiliang ka Wompher Laloo dei sñiawkhia yei burom yong u Tonkha wow Buitkha kiwa man ki khlawait ka Kur Iawchibidi, da pynkynmoo ko wa man iwa emkaam bha ha kani ka juk ka por wow chna noh yow mot sahnaam sah kynmoo khnang yow im i pyrtuid sah i naam yong ki teiñ la pateiñ.

Ya kani ka sngi da pynphooh pynphieñ wei pynchongchit leh da ki rwai ki chaad wa da chimbynta da ki khynnah, ki khynroo khyllood wa ki manbei ka Kur Iawchibidi.