Ka sorkar jylla ynne ka sngi da rai ko wow booh noh 2 tylli ki Corona Care Center wa 100 pyllong, wei ha kini ki Center daw pynbiang leh ya ki Oxygen.
Katkam i ong u Symbood Montri Rangbah, u Prestone Tynsong, ki 2 tylli ki Corona Care Center wa da booh toh ha IIM 100 pyllong wei waroh u em ki wa ki Oxygen, katwa kawi won toh ha TB Hospital Umsawli 100 pyllong heiwa 40 pyllong u em ki wa ki Oxygen.
Heiyatoh wa i e tika COVID 19, u Prestone da ong u wa i e tika ya kiwa 18 snem hadooh 44 snem i rta u sdang i nadooh ka 14 tarik uni u bnai, wei ki 42,000 tylli ki dawai u poi ki mynstep ka sngi.
Da ong u wa i e tika u man chwa i ya kitu kiwa da dep pynpsiah pyrtuid katkam ka hukum Ministry of Health and Family Welfare, heiwa da ong leh wa na ki dawai tika wa 42,000 tylli daw pynemkaam chwa ha ki District wa em i chah ktah wa joor heiwa ka chnat i chait i khiah daw pynbait chwa ko yeiwa emkaam kat nadooh mynnu u sdang i e tika.
Ha iwi i liang, u Prestone da pyntip u leh wa ka Oxygen ha ka jylla biang hi ko hadooh katni wei da yaklam leh wow pyntikna wym em i duna ha ki sngi wow wan.
Da ong chooh chooh u wa i pynkhreh neibynta ki Oxygen Plant dang lai i chaphrang wei ka sorkar em ko i thmu wow thied hi leh ya ki Oxygen Generator wa palat T. 25 lak kawi wow booh ha ki thaw wa emkaam dooh.
Hajrong i e tika ya kiwa 45 snem chajrong, da ong u wa dang em ki dawai wei hadooh katni da em kamwa 37% na kiwa chong chnong kiwa dadep yoh ya ini i dawai.
