Shillong: Ka sorkar jylla lyngba ka chnat puræ puthi, ynne ka sngi da pynbna ki wow chah u wai noh ya ki skur nadooh ka 30 tarik uni u bnai wei u wai toh hadooh u Thohlakhmi (Feb) yong u snem 2021 katkam i pynbait thymme ya ki lynnong wa da toh u pyndep.
U Montri wa pait ya ka chnat puræ puthi ka jylla, u Lahkmen Rymbui da pyntip u wa i wai yaki skur nadooh ka 30 tarik uni u bnai (November) u man ko neibynta ki khynnah Class IX hadooh XII ha ki thaw sor, kitæ ha Shillong, Jowai, Nongstoin, Nongpoh wa Tura, katwa ha ki thaw nongkyndong, laitnoh ya ka thaaiñ Khanapara ha Ri-Bhoi, u chah wow wai noh leh ya ki Class VI, VII wa VIII, deilang wa i bood pynrkhiñ ya ki kyndon, deiwa ong leh wa i wai ya ki skur chong ko leh ha i sñiaw chngaaiñ yong ki Managing Committee wa ki bei ki pa yong ki khynnah khem da pynbor ya ki khynnah skur.
Katkam wa ong u Rymbui, ka sorkar da chim ko ya ini i rai ha ka tayaw wa da dep, hadien wa da yoo wa ki Online Class ki krehkaam ki du kamwa 30% khamtam cha ki thaw wa cha nongkyndong ki yachem ki yei eh neibhah wym biang ka Internet wei i wym kotbor wow thied ya ki tiar kiwa syad.
Da ong wa ha ki thaw nongkyndong da chah wow pynman skur nadooh ki Class VI-XII, toh neidaw wa ha kini ki 9 bnai da chem ki khynnah skur yei eh wow pyndep yei puræ lyngba ki ‘Online Class’, deiwa pynrap chooh chooh wa lada ki bei ki pa ki sñiaw chngaaiñ ki cha ki thaaiñ nongkyndong, daw chah wow pynman skur noh leh ya ki khynnah Class I chaneiñ.
U Montri da ong u wa lada ki paidbah sñiaw lyngngoh ya ini i rai ka sorkar, ini toh i rai iwa da hap wow chim hadien wa da bichaaar bniah bha, neibhah ym ye wow pyntikna wa hadooh mynnu ka khlam u kut ko wei ym ye wow khang ya ki skur hadooh 2-3 snem.
