U Montri ka chnat PWD (R), u Prestone Tynsong ynne ka sngi hapoh ka yung dorbar hawa jubab yeiwa kylli ka MLA ka Sutnga Saipung, ka Santa Mary Shylla heiyatoh wa i pynku kyrdan ya u sarok NH-06 cha ka 4-Lane National Highway nadooh na Mawryngkneng cha Malidor, da pyntip u wa ka sorkar da pynkhreh ko wow leh yeini.
Da pyntip u wa kamwa man kattæ da pyndep wow leh ya ka Feasibility Report yow tip lada ye wow pynheh ya u sarok wei katni dang pynkhreh ya ka Detail Project Report.
Neiliang u MLA ka Mowkaiaw, u Nujorki Sungoh da kylli u wa lada dep su bai thaw cha ki tre thaw, neiliang u Prestone da ong u wan uni u sarok toh u National Highway kamtæ ya ka bai thaw da dep wow su chwa tangwa yow pynheh ya u sarok cha ka 4-Lane won, i thied yei thaw dang lai i chakhmat hadooh katni wei manda dep yeini, ki DC ki District won daw e kti ki yei thaw.
Neiliang u Nujorki deilang waka Santa da ong ki wa uni u sarok toh uwa emkaam bha ym du ya ka Meghalaya tangwa ya kiwi ki jylla wa em chajan kamtæ da kyntu ki ya u Montri wow chimkhia u ya ini i kaam.
U Prestone da khana u wa yow pynkylla 4-Lane u sdang ko nadooh na laad Umroi ha i thaw wa tip kam i Mawlyngkhung hadooh ha Ratacherra wei kani ka kreh namo ka Project da tip kam ka Economic Corridor kawa man kawa emkaam neibynta ka khayi pateiñ wei hadooh ka sorkar pyrdi leh chimkhia wei da booh ko hakhmat neibynta ini i kaam neibhah kani ka sarok pynyabi ym du ya kiwa boon ki chnong ka jylla tangwa kamjooh leh cha Assam wa kiwi de.
U Nujorki da kylli u leh chaphang i pynchna ya u sarok Jowai Bypass, heiwa u Montri da khana u wa da dep wow pynmih ya ka Work Order wei ka poisa leh da pynlait kawa dapoi kamwa T. 12 klur wei da phah leh ya u Contractor wow sdang noh yei kreh chisyndon.
