U Montri Rangbah ka jylla, u Conrad Kongal Sangma ynne ka sngi da pyntip u hapoh ka yung dorbar wa daw sdang noh wow lilam ya u mooyong wa da dep tih hapoh East Jaiñtia Hills, katkam wa phah ka National Green Tribunal.
Hawa jubab ynne ka sngi ya iwa kylli wa da wanrah da u MLA ka Congress na West Shillong, u Mohendro Rapsang, neiliang u Conrad da pyntip u wa ka NGT da booh ko ya i dor wow sdang lilam kawa man T. 4850 chi Metric Ton, deiwa pynrap leh wa na ini 10% u lai ko cha ka Coal India Limited kawa toh u pynlai ya i lilam.
Hawa jubab chooh chooh ya iwa kylli pynrap, u Conrad da ong u wa em 11 tylli ki Depot wa ka sorkar da pynkhreh ko neibynta wow lilam ya u mooyong kiwa kynthup ha East Jaiñtia Hills, West Khasi Hills, South West Khasi Hills wa South Garo Hills.
Da pyntip leh wa na kitai ki 11 tylli ki Depot, da em 6 tylli ki Depot kiwa da biang wow sdang noh ya i lilam wei da wanrah lut ya u mooyong na ki paar.
Hachwa ya ini, u Montri Rangbah da pyntip u leh wa ka Supreme Court lyngba i pynmih hukum ha ka 3 tarik Naiynñiaw 2019 da phah wa ya u mooyong wa da dep tih uwa em ha ki depot ka jylla toh wow chim lilam noh da ka Coal India katkam ki kyndon, deiwa pyntip leh wa ya i lilam daw sdang noh ha ki kajiak sngi wow wan.
